އެޓޯލްސް މިނިސްޓްރީ އަށް 15،000 ގައުމީ ދިދަ ގަތުމަށް އެ މިނިސްޓްރީ އިން 31 ޑިސެމްބަރު 2003 ވަނަ ދުވަހު ކުރި އިއުލާނާ ގުޅިގެން ނަމީރާ އިންޖިނިއަރިން ޕްރައިވެޓް ލިމިޓެޑު ނަމަކަށް ކިޔާ ކުންފުންޏެއްގެ މުވައްޒަފުން ބޭނުންކޮށްގެން ވުޖޫދުގައި ނެތް ހަތަރު ކުންފުންޏެއްގެ ނަމުގައި އެސްޓިމޭޓް ހުށަހަޅައި މަކަރާއި ހީލަތުން އެ ބިޑު ކާމިޔާބު ކުރިކަން ސާބިތުވެ 2015 ވަނަ އަހަރުގެ އޭޕްރިލް މަހުގެ 4 ވަނަ ދުވަހު އޭރުގެ ރައްޔިތުންގެ މަޖިލީހުގެ މެމްބަރަކު ޖަލަށް ލާން ސުޕްރީމު ކޯޓުން ހުކުމް ކުރި ހަނދާން ހުރީ ތިޔައިގެ ތެރެއިން ކިތޔައް ބޭފުޅުން ތޯއެވެ؟ އަދި އެ ހުކުމުގެ ސަބަބުން އެ މެމްބަރުގެ ގޮނޑި ގެއްލުނެވެ. މިހާރުގެ ދިއްގަރު ދާއިރާގެ މެމްބަރު ސުޕްރީމު ކޯޓާ މެދު ވަރަށް ނަފްރަތު ކުރައްވާ ދާދި ފަހުން މަޖިލީހުގެ ތަޅުމުގައި ވާހަކަ ދެއްކެވި ސަބަބަކީ މިހުކުމާ ގުޅިގެން ހިތުގައި މީގެ ކުރިން ޖެހިފައި ހުރި ހުރުމެއްގެ ހަމަ ޖެހުމެއް ހޯދަން އިއްވި ބަސްތަކެއް ކަމަށް ބެލެވިދާނެއެވެ.

މި ބުނެވިދިޔަ ހުކުމަށް ޖެހިލަމާ ބަހީއެވެ.

ނަމިރާ އިންޖިނިއަރިންގް އަށް ލިބޭ ޤާނޫނީ ސަހްސިއްޔަތުގެ ބޭނުން ނަހަމަގޮތުގައިކޮށް، އެކުންފުނީގެ މުއައްޒަފުން ބޭނުންކޮށްގެން އެބިޑް ހާސިލްކުރުމަށް މަކަރާ ހީލަތް ހަދާފައިވާކަން ސުޕްރީމްކޯޓަށް ހުށައެޅިފައިވާ ލިޔެކިއުންތަކާއި ހެކިވެރިންގެ ހެކިބަހުން ސާބިތުވާތީ، ނަމިރާ ކުންފުނީގެ މުވައްޒަފުން ބޭނުންކޮށްގެންނާއި، އެކުންފުންޔަށް ލިބިދޭ ޤާނޫނީ ސަޙްޝިއްޔަތުގެ ބޭނުން ނަހަމަ ގޮތުގައި ބޭނުންކޮށްގެން އުފަން ނުވާ ކުންފުނިތަކެއްގެ ނަމުގައި އެސްޓިމޭޓް ތައްޔާރުކޮށް، ހުށަހެޅުމުގެ ޒިންމާ ނަގަން ޖެހޭނީ އެކުންފުންޏެއްގެ ޑިރެކްޓަރުންކަމަށް ކުންފުންޏާބެހޭ ޤާނޫނުގައި ބަޔާންކޮށްފައިވާތީ، އެޓޯލްސް މިނިސްޓްރީ އަށް 15،000 ގައުމީ ދިދަ ގަތުމަށް އެ މިނިސްޓްރީ އިން 31 ޑިސެމްބަރު 2003 ވަނަ ދުވަހު ކުރި އިއުލާނާ ގުޅިގެން ނާޒިމްގެ ހިއްސާ އޮންނަ ނަމީރާ އިންޖިނިއަރިން ޕްރައިވެޓް ލިމިޓެޑުގެ މުވައްޒަފުން ބޭނުންކޮށްގެން ވުޖޫދުގައި ނެތް ހަތަރު ކުންފުންޏެއްގެ ނަމުގައި އެސްޓިމޭޓް ހުށަހަޅައި މަކަރާއި ހީލަތުން އެ ބިޑު ކާމިޔާބު ކުރި ކުރުމުގެ ޒިންމާ ނަގަންޖެހޭނީ ނަމިރާ ކުންފުނީގެ މެނޭޖިންގ ޑިރެކްޓަރުގެ ހައިސިއްޔަތުން އަހުމަދު ނާޒިމް ކަމަށާ މަކަރާ ހީލަތް ހަދައިގެން ބިޑް ހާސިލްކޮށްގެން ހޯދާފައިވާ އެއް މިލިއަން ހަތަރު ސަތޭކަ ފަންސަވީސް ހާސް ރުފިޔާ ދައުރުވެފައިވަނީ ނާޒިމްގެ ހިއްސާ އޮންނަ ކުންފުނިތަކުގެ އެކައުންޓުތަކަށް ކަމަށް އެނގެން އޮތުމުން ނާޒިމް އުމުރު ދުވަހަށް ޖަލަށްލާން ދިވެހިރާއްޖޭގެ ސުޕްރީމު ކޯޓުން ހުކުމް އިއްވިއެވެ. އެއީ މީގެ ގާތް ގަނޑަކަށް ދިހަ އަހަރު ކުރިއެވެ. އެއާއެކު ނާޒިމް މަޖިލީހުގައި އިން ގޮނޑި ވެސް ގެއްލިގެން ދިޔައެވެ. އަޅުގަޑު ނަމަވެސް ހިތުގައި ނުހަނު ޖެހޭނެއެވެ.

އޭގެ ފަހުން، 25 އަހަރަށް ޖަލަށްލުމަށް ސްޕްރީމް ކޯޓުން އިއްވި ހުކުމް ރިވިއު ކުރުމަށް ނާޒިމް ކޯޓަށް ހުށަހެޅިއެވެ. ބޮޑު ހުކުމެއްގައި ޖަލުގައި ހުރުމުގެ ބަދަލުގައި ބޭސް ފަރުވާ ޗައްކަރު ޖަހާ ގޮސް ރާއްޖެއިން ބޭރުގައި އަރާމުގައި ދިރިއުޅުމަށް ފަހު ވަކި ސަރުކާރެއް ނިމުން އެނބުރި ރާއްޖެ އައިސް ތިމާގެ ހުކުމް ބާތިލުކޮށްދޭނެ ސަރުކާރެއްގައި ސުޕްރީމު ކޯޓަށް އެ މައްސަލަ އަލުން ވެއްދިއެވެ.

އެއީ 2018 ވަނަ އަހަރުގެ ރިޔާސީ އިންތިހާބު އެމްޑީޕީއިން ކާމިޔާބުކޮށް އިބްރާހިމު މުހައްމަދު ސޯލިހު ވެރިކަމުގެ ހުވާ ކުރެއްވި ފަހުންނެވެ. ސުޕްރީމު ކޯޓަށް މައްސަލަ ވައްދާ އޭގެ މާކަ ގިނަ ދުވަހެއް ނުނަގާ ދިވެހިރާއްޖޭގެ ސުޕްރީމު ކޯޓުން ވަނީ އެ ކޯޓުގެ ނިހައީ ހުކުމެއް ފުރަތަމަ ފަހަރަށް ބަދަލުކޮށް ނާޒިމްއަށް ކުރިން އެ ކޯޓުން ކުރި 25 އަހަރުގެ ހުކުމް ބާތިލުކޮށްފައެވެ.

ރައްޔިތުންގެ މުދަލުންނާ ފައިސާއިން ބޮޑެތި ވައްކަންތައް ކޮށްފައި ހުރި މުޖުރިމަކު ހަގީގަތުގައި ވެސް މިއޮތީ ހަމަ ސުޕްރީމު ކޯޓުން ދޫކޮށްލާފައެވެ. އެހެންކަމުން އެއްކަލަ ދުވަހު މަކަރާ ހީލަތުން ރައްޔިތުންގެ ފައިސާއިން ބޮޑު ބިޔަ ވައްކަންކޮށްގެން ގެއްލުނު ގޮނޑީގައި އިނދެ ސުޕްރީމު ކޯޓުގެ ފަނޑިޔާރުން ސިޔާސީ އޮއިވަރުގައި ޖެހިފައި ތިބި ވާހަކަ ދައްކަވަން ނާޒިމް ހަމަ އެންމެ ތާހިރުތޯއެވެ؟ ސުޕްރީމު ކޯޓުގައި މިއަދު ތިބީ ސިޔާސީ ވެރިން ޖަހާ ބެރުތަކަށް ނެށުމަށް ތައްޔާރަށް ތިބި ކަމުގެ ސިގްނަލްތައް ދެމުންދާ ފަނޑިޔާރުން ކަމަށް ބުނެ ނާޒިމް އަޑަށް ބާރުލާ ވާހަކަ ދައްކަވަމުން ގެންދަވާއިރު ބަލަ މަނިކުފާނަކީ ވެސް ތިޔަ ވިދާޅުވާ ސުޕްރީމު ކޯޓުން، ބަޔަކަށް ވެރިކަން ލިބި އެންމެ މަހެއް ވެސް ނުވަނީސް ބޮޑު ބިޔަ ހުކުމަކުން މިިނިވަން މީހެއްކަން ހަނދާން ނެތުނީތޯއެވެ. ދެން ފަހަރުގައި ވިދާޅުވެފާނެއެވެ. ތިމަން މަނިކުފާނަކީ މައުސޫމު މީހަކަށްވުމުން މިނިވަންވީ ކަމަށެވެ. މަނިކުފާނު ވީމާ މައުސޫމުކަމުން މިނިވަންވީއެވެ. އެހެން ބަޔަކުނަމަ ސުޕްރީމު ކޯޓު ސިޔާސީވެ މިނިވަން ކުރީއެވެ. ހައުދަހާ ވާ މޮޅު ވާހަކައެކެވެ.

ޔާމީނުގެ ބާބަކީ ތިމަންނާގެ ހަޔާތުގައި ނިމިފައި އޮތް ބާބެކޭ، ތިމަންނާ ހިތުގައި ނަފުރަތެއް ނެތޭ ދެކޮޅުވެރިކަމެއް ވެސް ނެތޭ ވިދާޅުވެ މާ ޟައީފު މީހަކަށް ވާންވެގެން ދެއްވި އިންޓަރވިއު ވެސް އުނބަށް ޖަހާ ނުސީދާކޮށް ނަމަހީވެސް ރައީސް އަބްދުﷲ ޔާމީންގެ ވާހަކަ ނަމީރާ ނާޒިމުގެ ދުލުން ތިޔަ ދެއްކެވެނީ ރައީސް ޔާމީން ފްރޭމުކުރަން ދެވުނު ދުގު ހެކި ބަހުގެ އަލާ އަދިވެސް ނުކެނޑިގެން ބާއެވެ.

ސުޕްރީމު ކޯޓު އަޮތީ ސިޔާސީ އޮއިވަރެއްގައި ޖެހިފައޭ ބުނަން އނެގޭނީ ވެސް އެތަންތަން ސިޔާސީ ކުރި ބަޔަކަށްތާއެވެ. ނަމަވެސް ކަނޑިކި ބުރި ހަނދާން ނެތުމަކީ ދެރަވަރުގެ ދެރަ ފެންވަރުގެ ކަމެކެވެ. އެހެނީ 25 އަހަރުގެ ބޮޑުބިޔަ ހުކުމަކުން މުޖުރިމަކު ސަލާމަތް ވީ ވެސް ހަމަ ސުޕްރީމު ކޯޓުން ކަމަށް ވުމުންނެވެ. ނާޒިމް ހަނދާ ނެތް ނަމަ މިއަދުގެ ދިއްގަރު ދާއިރާގެ އެމްޕީއާ ނަމީރާ ނާޒިމް މި ސުވާލު ކޮށްލަބަލާށެވެ.

ނަމީރާ ނާޒިމްއެވެ. ދިއްގަރު ދާއިރާގެ އެމްޕީ ބޮޑު ހުކުމަކުން މިނިވަންވީ ކޮންތާކުން ހެއްޔެވެ؟