ވެރިކަމަށް ވަޑައިގަތުމުގެ ކުރިން ރައީސް ޑރ މުއިއްޒު ރައްޔިތުން ގާތު ވި ވައުދުތައް ނުފުއްދެވުމާ ގުޅިގެން ކުރީގެ ކޮމިޝަނާ އޮފް ޕޮލިސް އަދި ރައީސް ޔާމީންގެ ޕާޓީ ޕީއެންއެފް އުފެއްދެވުމުގައި އިސްކޮށް ހަރަކާތްތެރިވާ ހުސެއިން ވަހީދު ކަންބޮޑުވުން ފާޅުކޮށްފިއެވެ.
ހުސެއިން މިފަދައިން ވިދާޅުވެފައި ވަނީ ޗެނަލް 13 އިން ހޯމަ ދުވަހުގެ ރޭ ގެނަސްދިން ޕީއެންއެފް އަދާހަމަ ޕްރޮގްރާމްގައި ވާހަކަ ދައްކަވަމުންނެވެ.
ހުސެއިން ވިދާޅުވީ މި ސަރުކާރުން އައީ އެތައް ކަމަކަށް ވައުދުވެފައި ކަމަށާއި އެހެންނަމަވެސް އަދި އެކަންކަން ފުރިހަމަ ނުވާ ކަމަށެވެ.
އެގޮތުން ޑރ މުއިއްޒު ވެރިކަމަށް އައީ ރައީސް ޔާމީން މިނިވަން ކުރެއްވުމަށާއި، ބޭރުގެ އަސްކަރިއްޔާ ބޭރުކުރުމުގެ އިތުރުން ސިއްރު އެގްރީމެންޓުތައް ދެއްކުމަށާއި ރާއްޖެ ސަރަހައްދުން ގެއްލިފަ އޮތް ކަނޑު ހޯދައިދިނުން ފަދަ އެތައް ކަމަކަށް ވައުދެވެފައި ކަމަށް ހުސެއިން ވަނީ ވިދާޅުވެފައެވެ.
ރައީސް ޔާމީން މިނިވަން ކުރަންށޭ ކިޔާފަ އައީ،ބޭރުގެ އަސްކަރިއްޔާ ބޭރު ކުރާނަމޭ ކިޔާފަ އައީ، ސިއްރު އެގްރީމެންޓުތައް ދައްކާނަމޭ ކިޔާފަ އައީ، ރާއްޖެ ސަރަހައްދުން ގެއްލިފަ އޮތް ކަނޑުގެ މައްސަލައިގަ ހޯދަދޭނަމޭ ކިޔާފަ އައީ، މިއިން އެއްވެސް ކަމެއް ނުވެ.
ހުސެއިން ވަހީދު
ހުސެއިން ވިދާޅުވީ މި ވައުދުތައް ފުއްދުމަށް މި ސަރުކާރުން އަމަލީ ގޮތުން އެއްވެސް ކަމެއް ނުކުރާކަމަށެވެ.
ސަރުކާރުން ހަމައެކަނި ކުރާ ކަމަކީ ވަޒީފާ ތައް މީހުންނަށް ބަރިބަރި އަށް ދިނުން ކަމަށް ވެސް ހުސެއިން ވަނީ ވިދާޅުވެފައެވެ.
