

ގަވާއިދާ ހިލާފަށް ބަނގުރާ ގެންގުޅެ ބޭނުންކޮށް އެތަކެތީގެ ވިޔަފާރިކުރި ބިދޭސީއަކު ހައްޔަރުކޮށް، ޑީޕޯޓްކުރަން އިމިގްރޭޝަނާ ހަވާލުކޮށްފި އެވެ.
ފުލުހުން ބުނީ ބަންގްލަދޭޝްގެ ޝޮފިގުލް އިސްލާމް ކިޔާ އެ މީހާ ހައްޔަރުކުރީ މިދިޔަ ހަފްތާގެ ބުދަ ދުވަހު ކައުންޓާ ނާކޮޓިކްސް އިންޓެލިޖެންސާއި ޑްރަގު އެންފޯސްމަންޓް ގުޅިގެން ހިންގި އޮޕަރޭޝަނެއްގައި ކަމަށެވެ.
އުމުރުން 44 އަހަރުގެ އެ މީހާ މަގުމަތިން ހިފަހައްޓައި ބަލައިފާސްކުރުމުގެ އިތުރުން އޭނާ ދިރިއުޅޭ ގެ ވެސް ބަލައިފާސްކުރި ކަމަށް ފުލުހުން ބުންޏެވެ.
އެގޮތުން ބަލައި ފާސްކުރުމުގެ ތެރެއިން 18 ފުޅި ބަނގުރާ ފެނިފައިވާ ކަމަށް ފުލުހުން ބުންޏެވެ.
އަދި މިހާރު އެމީހާ ޑީޕޯޓުކުރުމަށް އިމިގްރޭޝަނާ ހަވާލުކޮށްފަވާ ކަމަށް ވެސް ފުލުހުން ބުންޏެވެ.