ރައީސް ޔާމީން / ތޭރަ އޮންލައިން
ސިޔާސީ
ފަނޑިޔާރުންގެ މައްސަލަތައް މި ބޭނުންކުރަނީ ހިމަ ރޮދި ފަށެއްގައި އެލުވާފައި އޮތް ތޫނު ކަނޑިއެއްގެ ގޮތުގައި: ރައީސް ޔާމީން
Mariyam Isaadha
މަރިޔަމް އިސާދާ
11 މާރިޗު 2025
މާލެ ސިޓީ

ފަނޑިޔާރުންގެ މައްސަލަތައް ޕާކުކޮށްފައި ބޭއްވުމަށް ފަހު ބޭނުން ކުރަނީ ހިމަ ރޮދި ފަށެއްގައި އެލުވާފައި އޮތް ތޫނު ކަނޑިއެއްގެ ގޮތުގައި ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ

ރައީސް ޔާމީން މިފަދައިން ވިދާޅުވީ ޕީއެންއެފުން ބުރާސްފަތި ދުވަހުގެރޭ ބޭއްވި ޖަލްސާގައި ގައުމުގައި މި ވަގުތު ހިނގަމުން ދާ ޖުޑިޝަރީއަށް ނުފޫޒު ފޯރުވުމުގެ ސިލްސިލާއަށް ނަޒަރު ހންގަވާ ލައްވާ ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ، ފަނޑިޔާރުން ހަދާ ގޯސް ވަގުތުން ވަގުތަށް ނުބަލާ ކަނަކަށްލާ ފޮރުވާފައި ބެހެއްޓުމަށް ފަހު ވެރިންގެ ގޮތުގައި ތިއްބަވާ ބޭފުޅުން ހިތްޕުޅާ ނުވާ ފަދަ މައްސަލަތައް ބެލުމާ ހުކުމު ކުރުމުން، ރައްކާކޮށްފައި ހުރި މައްސަލަތައް ނަގާ އަލުން ހިރަފުސް ފޮޅާ ބަލަން ފެށުމަކީ ނަޒާޙަތްތެރި ގޮތް ނޫން ކަމަށެވެ. އެގޮތުން ރައީސް ޔާމީން އިޝާރާތްކުރެއްވީ ސުޕްރީމު ކޯޓުގެ ކުރީގެ ފަނޑިޔާރު ހުސްނުއްސުއޫދާ މެދު ޖޭއެސްސީ މެދުވެރިކޮށް ސަރުކާރުން ކަން ކުރަން ފެށި ގޮތެވެ.

އެގޮތުން ސުއޫދުގެ ސުލޫކީ މައްސަލައެއް ކަމަށް ބުނެ މިހާރު ބަލަން ފަށާފައިވަނި 2022 ވަނަ އަހަރު ހިނގާ ދިޔަކަމަކަށްވާއިރު މި ސަރުކާރު އައިސް 15 މަސް ވެގެން ދިޔައިރު އެކަން ސަރުކާރުން ނުބަލާ އޮތުމަށް ފަހު ސަރުކާރު ނުރެހޭ ކަމެއްގެ މައްސަލައެއް ބަލަން ފަށާއިރަށް ރޮދި ފަށެއްގައި ހިފާ ދަމާ އުސޫލުން އެ މައްސަލަ ފެންމަތިކުރުން ރަގަޅު ނޫން ކަމަށްވެސް ރައީސް ޔާމީން ވިދާޅުވިއެވެ.

ޖޭއެސްސީ މިހާރުވެސް އެ ބޭނުންކުރަނީ ހަތިޔާރެއްގެ ގޮތުގައި. ފަނޑިޔާރުންގެ މައްސަލަ ބަލްނ އެކަމެއް ހިނގާތާ ވަކި މުއްދަތެއްގެ ތެރޭގައި ބަލަން ނޯވޭތޯ. މިހާރު ހުސްނުއްސުއޫދުގެ މައްސަލަ މިބަލަނީ ދުސްތޫރީ މައްސަލައެއް އައީމަތޯ އެ މައްސަލަ ބަލަން މި އެނގުނީ. ހުސްނުއްސުއޫދަކީ ސިޔާސީ ބޭފުޅެއްކަން ޖޭއެސްސީއަށް އެނގެން ޖެހެނީ މިއަދަކު ނޫން. ފަނޑިޔާރުންގެ މައްސަލަތައް ޕާކުކޮށްފައި ބޭއްވުމަށް ފަހު ދެން މިބޭނުން ކުރަނީ ހިމަ ރޮދި ފަށެއްގައި އެލުވާފައި އޮންނަ ތޫނު ކަނޑިއެއްގެ ގޮތުގައި

- ރައީސް ޔާމީން

ރައީސް ޔާމީން ވިދާޅުވީ އެމަނިކުފާނު ސުއޫދު ދިފާއު ކުރަނީ ނޫން ކަމަށާ އެމަނިކުފާނު ދިފާއު ކުރަނީ ޖުޑިޝަރީ ކަމަށެވެ. އެގޮތުން ދުސްތުރީ މައްސަލައެއް ކޯޓުގައި ހިނގަމުން ދަނިކޮށް ކުއްލި ގޮތަކަށް ފަނޑިޔާރުން ސަސްޕެންޑުކުރުމާ ސުލޫކީ މައްސަލަތައް ފެންމަތިވުން ބަލައިނުގަވެނޭ ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން މިފަދައިން ވިދޅާުވެފައިވާއިރު މިހާރު ސަރުކާުރން ގެންދަނީ ސުޕްރީމު ކޯތުގެ އެކި އެކި ފަނޑިޔާރުންގެ ސުލޫކީ މައްސަލަ ފެންމަތިކޮށް ޖޭއެސްސީ މެދުވެރިކޮށް އެ ފަނޑިޔާރުންނަށް ބިރު ދައކަމުން ކަމަށް އަޑުތައް ގަދަވެފައިވެއެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved