ޑރ. ޖަމީލު ޗެނަލް13 ގެ ނިއުސް ޓޯކު ޕްރޮގްރާމުގައި ވާހަކަ ދައްކަވަނީ / ތޭރަ އޮންލައިން
ސިޔާސީ
މުއިއްޒަށް ކިޔަންވީ ނަމެއް ޑިކްޝަނަރީއަކު ނެތް: ޑރ ޖަމީލު
Mariyam Isaadha
މަރިޔަމް އިސާދާ
12 މާރިޗު 2025
މާލެ ސިޓީ

ރައީސް ޑރ މުހައްމަދު މުއިއްޒުގެ އަމަލުފުޅުތައް ބައްޓަން ކުރައްވަމުން އަދި ދައްކަވަމުން ގެންދަވާ ވާހަަކަފުޅުތަކާ ގުޅިގެން އެމަނިކުފާނަށް ނަމެއް ދޭން ބަލާއިރު އެމަނިކުފާނު މިވަގުތު އަމަލުކުރައްވަމުން ގެންދަވާ ގޮތަށް ބަލާ ދޭނެ ނަމެއް ޑިކްޝަނަރީގައި ވެސް ނެތް ކަމަށް ވިދާޅުވެ ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ފާޑުވިދާޅުވެއްޖެއެވެ.

ފައިސާ ޗާޕުނުކުރާނެ ކަމަށް ވިދާޅުވެ މެޑަލް ޖެއްސެވުމަށްފަހު ރައީސް މުއިއްޒުގެ ސަރުކާރުން ބިމެއް ގަންނަން މިހާރު 14 ބިލިއަން ރުފިޔާއަށް ވުރެ ގިނަ ފައިސާ ޗާޕުކުރަން އުޅޭތީ އެކަމަށް ފާޑުވިދާޅުވެ ޑރ ޖަމީލު ވަނީ އެކްސް ޕޯސްޓެއް ކުރައްވާފައެވެ.

އެ ޕޯސްޓުގައި އެމަނިކުފާނު ވިދާޅުވެފައިވަނީ، ރައީސް މުއިއްޒަކީ ހަމައެއް، އުސޫލެއް އޮތް ބޭފުޅެއް ނޫން ކަމަށާ އެއްވެސް ކަމެއްގައި ރައީސް މުއިއްޒު ތެދު ނުހައްދަވާ ކަމަށެވެ. އަދި އިތުބާރަކީ ރައީސް މުއިއްޒު ހިފަހައްޓާ އެއްޗެއް ނޫންކަމަށް ވިދާޅުވެ ޑރ ޖަމީލު ވަނީ ރައީސް މުއިއްޒެކޭ މޫނު ނިވާކޮށްގެން ހުރެ މަގުފޭރޭ އުޅޭ މީހެކޭ ތަފާތެއް ނެތްކަމަށް ވިދާޅުވެފައެވެ. ރައީސް މުއިއްޒު ވެރިކަން ހޯދީ ހުސްބުހުތާނު ދޮގުންކަމަށް ވެސް ޑރ ޖަމީލު ވަނީ ވިދާޅުވެފައެވެ.

ރާއްޖޭގެ ތާރީޚުގައިވެސް މިއިން ދުވަހަކުވެސް ފައިސާޗާޕުނުކުރާ މިންވަރަކަށް މި ސަރުކާރުން ފައިސާ ޗާޕުކުރަން ނިންމާފައިވާތީ ޑރ ޖަމީލުގެ ފާޑުކިޔުން އަމާޒުވެފައިވާއިރު، މި ސަރުކާރުން އިގްތިސޯދީ ހަރުދަނާ ފިޔަވަޅުތައް އަވަސްނުކޮށްފިނަމަ ގައުމު ބަނގުރޫޓު ވެދާނެކަމުގެ އިންޒާރު ބައިނަލްއަގްވާމީ މާލީ އިދާރާތަކުން ދީފައިވާކަންވެސް ފާހަގަކޮށްލެވެއެވެ. އެހެންކަމަށްވާއިރު ފައިސާ ޗާޕުކުރުމަކީ ގައުމުގެ އިގްތިސޯދަށް އޭގެ ނޭދެވޭ އަސަރު ނުހަނު ބޮޑަށް ކުރާނެ ކަމެކެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved