ރައީސް ޑރ މުހައްމަދު މުއިއްޒުގެ މޭސްތިރިކަމުގައި މި ސަރުކާރުން ހިންގި ހުރިހާ އިންވެސްޓްމަންޓުތަކެއް ފްލޮޕްވެ ރައްޔިތުންގެ އިތުބާރު ގެއްލިއްޖެ ކަމަށް ޕީއެންއެފްގެ އިސް ސަފުގައި މަސައްކަތްކުރައްވާ މުހައްމަދު އަހުމަދު ވަހީދު (ވައްޑެ) ވިދާޅުވެއްޖެއެވެ.

މި ދިޔަ ބުރާސްފަތި ދުވަހުގެރޭ ޕީއެންއެފުން ބޭއްވި ޖަލްސާގައި ގައުމުގެ އިގްތިސޯދު އޮތް ހާލަތާ މެދު ވާހަކަ ދައްކަވަމުން ވައްޑެ ވިދާޅުވީ، މިއަދު ފެންނަމުން ދަނީ މި ސަރުކާރަށް ޕްރޮޖެކްޓުތައް ހިންގަން ނޭނގި ފެއިލްވަމުން ދާ މަންޒަރު ކަމަށެވެ.

އެގޮތުން ބަންކަރިންގެ ޚިދުމަތްވެސް ސަރުކާރުން ފެށި ނަމަވެސް ކުރިއަށް ނުގެންދެވުނުކަން ފާހަގަކުރައްވާ ވައްޑެ ވަނީ އިކޮނޮމިކު މިނިސްޓަރު ސައީދުވެސް ގައުމުގެ އިގްތިސޯދީ ހާލަތު އޮޅުވާނުލައްވާ ރައީސް މުއިއްޒަށް ވިދާޅުވެދެއްވަން ޖެހޭ ކަމަށެވެ.

ވައްޑެ ވިދާޅުވީ ރައީސް މުއިއްޒު ގައުމު ހިންގަވަން އުޅުއްވަނީ ކަންމަތީ ފިހާރައެއްގެ ވިކުރާ ބަހަލައްޓާވާ އުސޫލުން ކަމަށަ ނަމަވެސް އެހެން ގައުމު ނުހިންގޭނެ ކަމަށެވެ.

މީގެ އިތުރުން ރައީސް އަބްދުﷲ ޔާމީން ވަނީ ގައުމުގައި ރައީސުން ވެރިކަން ކުރައްވަންވީ ގޮތުގެ ބެންޗެމާކެއް ޖައްސަވާދެއްވާފައިކަން ފާހަގަކުރައްވާ ވައްޑެ ވިދާޅުވީ އެހެންކަމުްނ ގައުމުގެ ވެރިންގެ ގޮތުގައި ތިއްބަވާ ބޭފުޅުން އެ ބންޗުން މާކުން ވެރިކަން ކުރަން ފެއްޓެވުމުން ހައްލު ފެނިގެން ދާނެ ކަމަށެވެ.