

ހޮޅުދޫ ބޯޓުގައި ރޭ ރޯވެ ހިނގި އަލިފާނުގެ ހާދިސާގައި، ގެއްލުނު ލ. މާވަށު، އަލީ މުޝްފިގް ޝަރީފް، 25 ހޯދުމުގެ އޮޕަރޭޝަންގައި ޑްރޯން ބޭނުންކުރަން ފަށައިފިއެވެ.
މިކަން ހާމަވެފައިވަނީ މޯލްޑިވްސް ނޭޝަނަލް ޑިފެންސް ފޯސް އެމްއެންޑީއެފުން ރަސްމީ އެކްސް ހެންޑްލްގައި ކުރި ޕޯސްޓަކާއި ގުޅިގެންނެވެ.
އެގޮތުން މުޝްފިގް ހޯދުމުގެ މަސައްކަތް ކޯސްޓްގާޑް ޝިޕް ޢާޒީ، އެފްއައިސީ މާފަތް، އެޗްޕީ 114، ޑައިވަރުންނާއި އެއާރ ކޯރގެ ޑްރޯން އަދި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ގުޅިގެން ކަނޑުމަތިންނާއި ޑައިވްކޮށްގެން އަދި ވައިގެ މަގުން ކުރަމުންދާކަމަށް ހާމަކޮށްފައިވެއެވެ.
އެމްއެންޑީއެފް ކޯސްޓްގާޑް ޝިޕް ޢާޒީ، އެފްއައިސީ މާފަތް، އެޗްޕީ 114، ޑައިވަރުންނާއި އެއާރ ކޯރގެ ޑްރޯން އަދި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ގުޅިގެން ކަނޑުމަތިންނާއި ޑައިވްކޮށްގެން އަދި ވައިގެ މަގުން ޢަލީ މުޝްފިޤް ޝަރީފް ހޯދުމުގެ މަސައްކަތް ދަނީ ކުރަމުން.
— Maldives National Defence Force (@MNDF_Official) April 3, 2025
ސިފައިންގެ އިތުރުން ޢަލީ މުޝްފިޤް ޝަރީފް ހޯދުމުގެ މަސައްކަތައް ލ.މާވަށުން ވެސް ވަނީ މީހުން ގޮސްފައެވެ.
ކަނޑޫދޫ ކައިރިން ބޯޓުގައި އަލިފާން ރޯވެ އަނދައި ހުލިވީ މާލެ ދަތުރުކުރަނިކޮށް ކަމަށް ވެއެވެ.
ރޭ އިރާކޮޅު ބޯޓުގައި އަލިފާން ރޯވުމާއިއެކު އެންމެން ލައިފް ޖެކެޓް އަޅައި މޫދަށް ފުންމާލިއެވެ. އެމީހުން ސަލާމަތް ކުރީ އެސަރަހައްދަށް ދިޔަ ލޯންޗްތަކުންނެވެ.
އެގޮތުން އެ ބޯޓުގައި ދަތުރުކުރި 18 މީހުންގެ ތެރެއިން 17 މީހުން ވަނީ ސަލާމަތްކޮށްފައެވެ.