އިންސާނީ އެހީއެއް ޣައްޒާއަށް ނުވެއްދޭނެކަމަށް ސަހްޔޫނީން ބުނެފިއެވެ.

ސަހްޔޫނީން ވަނީ މާޗް 18 ވަނަ ދުވަހުން ފެށިގެން ޣައްޒާ ހުރަސްކޮށް ވައިގެ މަގުންނާއި ބިމުން ހަމަލާތައް އަލުން ފަށާފައެވެ.

ސަހްޔޫނީން ދަނީ ފަލަސްތީނުގެ ރައްޔިތުންނަށް ދޭ މުހިންމު ބައިނަލްއަޤްވާމީ އެހީތައް ވަނުމަށް ހުރަސް އަޅައި ވަރުގަދައަށް ކޮންޓްރޯލް ކުރަމުންނެވެ. އަދި މާޗް މަހުގެ 2 ވަނަ ދުވަހުން ފެށިގެން ސަހްޔޫނީން ވަނީ ޣައްޒާއަށް ވައްދާ އިންސާނީ އެހީއަށް ހުރަސް އަޅާ ބަންދުކުރަމުންނެވެ.

ސަހްޔޫނީންގެ ހަމަލާ އަލުން ފެށިފަހުން އެތައް ލައްކަ ބަޔަކު ވަނީ ގެދޮރު ގެއްލުމުގެ ސަބަބުން މަގުމަތިވެފައެވެ.

އޭޕްރީލް މަހުގެ 28 ވަނަ ދުވަހު އިންޓަނޭޝަނަލް ކޯޓް އޮފް ޖަސްޓިސް އިން ފަލަސްތީނުގެ ރައްޔިތުންނާ މެދު ސަހްޔޫނީން ލާޒިމުވާ އިންސާނީ ވާޖިބުތަކުގެ އަޑުއެހުންތައް ހުޅުވާލަން ވަނީ ހަމަޖެހިފަ އެވެ.

އދ.ގެ އާންމު މަޖިލީހުން ވަނީ މިދިޔަ ޑިސެމްބަރު މަހު ސަހްޔޫނީންނާއި ދެކޮޅަށް ގަރާރެއް ފާސްކޮށްފަ އެވެ.