ސިސްޓަމްއަށް ލަނީ ގާބޭޖު ވިއްޔާ ސިސްޓަމުން ނުކުންނާނީ ވެސް ގާބޭޖުކަމަށް ވިދާޅުވެ ގައުމުގެ ހިންގުމުގެ ނިޒާމުގެ ކަންކަން ކުރިއަށްދާ ގޮތާ މެދު ރައީސް އަބްދުﷲ ޔާމީން ފާޑުވިދާޅުވެއްޖެއެވެ.

ރައީސް ޔާމީންގެ ފާޑުކިޔުން މިފަދައިން އަމާޒުކުރެއްވީ ބުރާސްފަތި ދުވަހުގެރޭ ބޭއްވި ޕީއެންއެފްގެ ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ، ސުޕްރީމު ކޯޓުގެ ފަނޑިޔާރުގެ މަގާމަށް ހައި ކޯޓުގެ ފަނޑިޔާރު މުހައްމަދު ސަލީމު އައްޔަން ކުރަން މަސައްކަތްކުރަނީ އޭނާގެ ޝަރުތު ފުރިހަމަ ނުވާއިރުކަމަށް ވީއިރު ގަވާއިދާ ޚިލާފަށް އެކަން ކުރަނީ އޭގެ ފަހަތުގައި ބައިވަރު ސިއްރުތައް ހުރުމުން ކަމަށެވެ.

ރައީސް ޔާމީން ވިދާޅުވީ މައްސަލައަކީ ސުޕްރީމު ކޯޓުގެ ފަނޑިޔާރުކަމަށް ސަލީމު އައްޔަންކުރުން ނޫން ކަމަށާ މައްސަލައަކީ އޮންނަ ނިޒާމުގެ ބޭރުން އެކަން ކުރަން އުޅުން ކަމަށެވެ. އެގޮތުން ކަންކަމަށް ގާބިލު ނޫން ބޭބޭފުޅުން ތަންތަނަށް އައްޔަންކުރުމުން ކަން ވެގެންދާ ގޮތް ވަރަށް ކައިރިން މި ސަރުކާރުގެ ތެރެއިން ފެންނަމުން ދާ ކަމަށާ އެގޮތުން ނިޒާމުގެ ތެރެއިން އޭގެ ނަތީޖާއަކަށް ފެންނަނީ ކަމެއް ނުވެދާ މަންޒަރު ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ އުންސުރެއް ފަންސުރެއް ނުބަލާ، އިޖުރާއަތެއް ނުބަލާ ސަރުކާރުން ބޭނުންވާ ކަންކަން ދަނީ ކުރަމުން ކަމަށެވެ.