ޣައްޒާގައި ޝަހީދުވި މީހުންގެ އަދަދު 29 ހާހަށް އަރައިފިއެވެ.

އިޒްރާއިލު ޔަހޫދީން ފަލަސްތީނަށް ދެމުންދާ އަނިޔާވެރި ހަމަލާތަކުގެ ޝިކާރައަކަށް ވެ 29 ހާހަށް ވުރެ ގިނަ މީހުން ޝަހީދު ވެފައިވާ އިރު އިސްރާއުލުން އަދިވެސް ދަނީ ހުއްޓުމެއް ނެތި ހަމަލާތައް ދެމުންނެވެ.

އިޒްރާއިލުން ދަނީ ހޮސްޕިޓަލް ތަކަށާއި މީހުން ގިނައިން ދިރިއުޅޭ ތަންތަނަށް އަމާޒު ކޮށް ބަޑީގެ ހަމަލާތައް ދެމުންނެވެ. އެގޮތުން މީގެ ކުރިން ނާސިރު ހޮސްޕިޓަލަށް ދިން ބަޑީގެ ހަމަލާތަކުގައިވެސް އެތައް ބަޔަކު ވަނީ ޝަހީދު ވެގެން ގޮއްސައެެވެ.

ޣައްޒާގެ ހެލްތް މިނިސްޓްރީ އިން ހާމަކޮށްފައިވާ ގޮތުގައި އިސްރާއިލުގެ އަސްކަރިއްޔާއިން ހޮސްޕިޓަލު ތަކުގެ ކަރަންޓާ އޮކްސިޖަން ކަޑާލުމުގެ ސަބަބުން ހާން ޔޫނިސްގެ ނާސިރު ހޮސްޕިޓަލްގައި އެތައްބަޔަކު ފަރުވާ ނުލިބި ވަނީ ޝަހީދުވެފައެވެ.

މީގެ އިތުރުން އިސްރާއިލުން ދަނީ ޣައްޒާއަށް ކާބޯތަކެއްޗާ އެހެނިހެން ޒަރޫރީ ތަކެތި އެތެރެ ކުރުމަށްވެސް ހުރަސްއަޅަމުންނެވެ.

އޮކްޓޯބަރު މަހުގެ 7 ވަނަ ދުވަހުން ފެށިގެން އިސްރާއިލުން ފަލަސްތީނަށް ދެމުންދާ އަނިޔާވެރި ހަމަލާތަކުގެ ޝިކާރައަކަަށް ވެ މިހާތަނަށް 29،092 މީހަކު ވަނީ ޝަހީދުވެފައެވެ. އަދި އެކި ވަރުގެ އަނިޔާތައް ލިބި 69،028 މީހަކު ވަނީ ޒަހަމްވެފައެވެ.