ރައީސް އޮފީހުގެ ތަރުޖަމާނުގެ މަގާމު ހުސްވެފައި އޮންނަތާ މިއަދަށް 50 އަށްވުރެ ގިނަ ދުވަސްވެއްޖެއެވެ.

އެ އޮފީހުގެ ތަރުޖަމާނުގެ ގޮތުގައި ހުންނެވި މުހައްމަދު ޝަހީބު އެ މަގާމުން ވަކިކޮށް އޭނާއަށް ފޮރިން މިނިސްޓްރީގެ ސްޓޭޓު މިނިސްޓަރުގެ މަގާމަށް ބަދަލުކޮށްފައިވަނީ ޖެނުއަރީ މަހުގެ ފުރަތަމަ ދުވަހުއެވެ.

ތަރުޖަމާނުގެ މަގާމުން ޝަހީބު ވަކިކޮށްފައިވަނީ އޭނާ އެ މަގާމަށް އައްޔަންކުރިތާ 18 ދުވަސް ފަހުންކަންވެސް ފާހަގަކޮށްލެވެއެވެ.

މަގާމުން ވަކިކޮށް އެހެން މަގާމަކަށް ޝަހީބް އައްޔަން ކުރެވުނު މައިގަަނޑު ސަބަބު ސަރުކާރުން ހާމަކޮށްފައިނުވެއެވެ.

ޝަހީބު ސަރުކާރުގެ ތަރުޖަމާނުގެ މަގާމަށް އައްޔަން ކުރުމުން ނޫސްވެރިންގެ ފަރާތުން ފާޑުކިޔުން އަމާޒުވެގެން ގޮސްވެފައިވެއެވެ.

މަގާމުގައި ހުންނެވިއިރު ނޫސްވެރިންގެ ބައްދަލުވުންތައް ކުރިއަށް ގެންދިޔަ ގޮތާމެދު ވެސް ބައެއް ނޫސްވެރިން ފާޑުކިޔުން އަމާޒުކޮށްފައިވަނީ ނޫސްވެރިންގެ ސުވާލުތަކަށް ޝަހީބަށް ޖަވާބުނުދެވޭތީ ކަމަށްވެސް ފާހަގަވެއެވެ.

ނޫސްވެރިންގެ ބައްދަލުވުންތައް ރައީސް އޮފީހުގައި ނުބާއްވާއިރު ވަޒީރުންގެ މަޖިލީހުގެ ނިންމުންތައް ހާމަކުރާ ނޫސްވެރިންގެ ބައްދަލުވުންތައް ކުރިއަށް ގެންދަވަނީ ރައީސް އޮފީހުގެ ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް އިބްރާހީމް އެވެ.

ހާމަކަން ބޮޑު ސަރުކާރެއްގެ ގޮތުގައި ދައުވާ ކުރާ ސަރުކާރުގެ ކަންކަން ތިލަކޮށްދެއްވާނެ ފަރާތެއް ނެތި މިހާ ގިނަ ދުވަސް ވަމުން ދާތީ ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.