އިސްރާއީލުގެ އަނިޔާވެރި ހަމަލާތަކުގެ ޝިކާރައަކަށްވެ ޣައްޒާގެ އެތައް ބަޔަކު ޝަހީދުވެއްޖެއެވެ.

ފަލަސްތީނުގެ ދައުލަތުގެ ނޫސް އެޖެންސީ ކަމަށްވާ ވަފާ އިން ހާމަކޮށްފައިވާ ގޮތުގައި އިސްރާއީލުން ޣައްޒާގެ އެކި ހިސާބުތަކަށް ދިން ހަމަލާތަކުގެ ސަބަބުން އެތައް ބަޔަކު ވަނީ ޝަހީދުވެފައެވެ.

އެގޮތުން މައުލޫމާތު ލިބިފައިވާ ގޮތުގައި ޣައްޒާގެ ދެކުނުގެ ރަފާހުގެ އިރުމަތީގައި އޮންނަ އަލް ޖެނީނާ ސަރަހައްދުގެ ގެއަކަށް އިސްރާއީލު ސިފައިން ބޮން ގޮއްވާލުމުގެ ސަބަބުން 8 މީހަކު ވަނީ ޝަހީދުވެފައެވެ. އޭގެ ތެރޭގައި ކުޑަކުދިން ހިމެނޭކަންވެސް ފާހަގަކުރެވެއެވެ.

މީގެ އިތުރުން ޣައްޒާގެ ދެކުނުގެ ޚާން ޔޫނިސް ކައިރީގައި އޮންނަ އަލް މަވާސީ ސަރަހައްދުގައި ގެދޮރު ގެއްލިފައިވާ ފަލަސްތީނުގެ ރައްޔިތުންނަށް އަމާޒުކޮށް ބޮން ގޮއްވާލުމުގެ ސަބަބުން 6 މީހަކު ވަނީ ޝަހީދުވެފައެވެ. އަދި އިތުރު ބަޔަކު ވަނީ އެކި ވަރުގެ އަނިޔާތައް ލިބި ޒަހަމްވެފަ އެވެ.

ފަލަސްތީން ރެޑް ކްރެސެންޓް ސޮސައިޓީން ހާމަކުރި ގޮތުގައި ޣައްޒާގެ ދެކުނުގައިވާ ޚާން ޔޫނިސްގެ ހުޅަނގުގައި ހުންނަ ޑޮކްޓަރސް ވިތައުޓް ބޯޑާސްގެ އޮފީހުން ޝަހީދުވި 2 މީހުންގެ އިތުރުން ޒަޚަމްވި 8 މީހުންގެ ހަށިގަނޑު ހޯދާފައިވާ ކަމަށެވެ.

ޣައްޒާ ސިޓީގެ އިރުދެކުނު ސަރަހައްދުގައި އޮންނަ ޒައިޓޫން ސަރަހައްދުގެ ބައެއް ގެތަކަށް އިސްރާއީލުގެ އަސްކަރިއްޔާއިން ބޮން ގޮއްވާލުމުގެ ސަބަބުން އެތައް ބަޔަކު ވަނީ ޝަހީދުވެގެން ގޮއްސައެވެ. އަދި ގިނަ އަދަދެއްގެ ރައްޔިތުންނަށް ވަނީ އެކިވަރުގެ އަނިޔާލިބި ޒަހަމްވެފަ އެވެ.

މީގެ އިތުރުން ގިނަ ބަޔަކު ކޮންކްރީޓު ތަކުގެ ދަށުގައި ތާށިވެފައި ތިބިއިރު ސަލާމަތީ ހިދުމަތްތައް އަދިވެސް އެމީހުންނާ ހަމައަށް ނުދެވޭ ކަމަށް ވެސް ވަނީ މައުލޫމާތު ލިބިފައެވެ.

އޮކްޓޯބަރު 7 ވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންދާ އަނިޔާވެރި ހަމަލާތަކުގެ ޝިކާރައަކަށްވެ ފަލަސްތީނުގެ 29،195 މީހުން ވަނީ ޝަހީދުވެފައެވެ. އަދި އެކިވަރުގެ އަނިޔާތައް ލިބި 69،170 މީހުން ޒަޚަމްވެފައިވާ ކަމަށް ޣައްޒާގެ ހެލްތު މިނިސްޓްރީން ވަނީ ހާމަކޮށްފައެވެ.