ވެރިންގެ ސުފުރާ މަތިން ވެއްޓޭ ބަތްފުށް ކެއިންބައްލަވަންޏާ އެއްވެސް ކަމެއް ހައްލު ނުކުރެވޭނެކަމަށް ރައީސް އަބްދުﷲ ޔާމީން އަބްދުލްގައްޔޫމްގެ ތާއިދާއެކު ޕީއެންއެފްގެ ފަރާތުން 20 ވަނަ ރައްޔިތުންގެ މަޖިލިސް އިންތިޚާބްގައި މައްޗަންގޯޅި އުތުރު ދާއިރާއަށް ކުރިމަތިލައްވާ އަސްއަދު ޝަރީފް ވިދާޅުވެއްޖެއެވެ.

އަސްއަދު މިފަދައިން ވިދާޅުވެފައިވަނީ ދައުލަތުގެ މީޑީޔާގެ ފަރާތުން 20 ވަނަ ރައްޔިތުންގެ މަޖިލީހަށް ކުރިމަތި ލައްވާ ކެންޑިޑޭޓުންގެ މެދުގައި ކުރިޔަށް ގެންދިޔުމަށް ހަމަ ޖައްސާފައިވާ ބަހުސްގެ ތެރެއިން "މައްޗަންގޯޅި އުތުރު" ދާއިރާއަށް ކުރިމަތިލައްވާފައިވާ ކެންޑިޑޭޓުންގެ މެދުގައި ކުރިޔަށް ގެންދިޔަ ބަހުސްގެ ތެރެއިން ވާހަކަދައްކަވަމުންނެވެ.

އެގޮތުން މަޖިލީގެ މެމްބަރުންގެ މުސާރަޔާއި އިނާޔަތްތަކަކީ މެމްބަރުން އަމިއްލައަށް ކަނޑައަޅައި އެއްޗެއްގެ ގޮތުގައި އޮތުމަކީ އެންމެ ރަނގަޅު ގޮތްތޯ މޮޑެރޭޓަރ އެއްސެވުމުން، އައްސަދު ވިދާޅުވީ އެކަމަކީ ރައްޔިތުން ވަރަށް ބޮޑަށް ކަންބޮޑުވާ މައްސަލައެއްކަމަށެވެ. މަޖިލީހުގެ މެމްބަރުން ވިޔަސް އެހެންތަނެއްގެވެސް ބަޔަކު އަމިއްލަ އަށް މުސާރަ ބޮޑުކުރާ ކަމަކީ ކަންބޮޑުވާ ކަމަކަށްވާއިރު މިކަމަށް އަދިވެސް އެއްވެސް ވަރެއްގެ ހައްލެއް ގެނެވިފައި ނެތްކަމަށްވެސް އައްސަދު ވަނީ ބަހުސް ކުރައްވަމުން ވިދާޅުވެފައެވެ.

އޭގެއިތުރުން އައްސަދު ވިދާޅުވީ ދާއިރާގެ ރައްޔިތުން ކިތަންމެ ގިނަ ކަމުގައިވީނަމަވެސް މަޖިލިސް މެމްބަރުންގެ އަދަދު ލިމިޓް ކުރެވެން ވާނެކަމަށެވެ.

ކޮރަޕްޝަނާއި ވަޒީފާ އާއި ނުފޫޒު ބޭނުންކޮށްގެން ޕޯޑިއަމްތަކަށް އަންނަ ބޭފުޅުންނަށް މިކަންކަން ހައްލުވެގެން ނުދާނެކަމަށާއި މިނިވަންކަމާއި އިހްލާސްތެރިކަމާއި، ނަޒާހާތްތެރި ކަމާއެކު މަސައްކަތްކުރާ ބަޔަކަށް ނޫނީ މިކަންކަން ހައްލުނުވާނެކަމަށް ވެސް އައްސަދު ވަނީ ވިދާޅުވެފައެވެ.

އައްސަދު އިތުރަށް ވިދާޅުވީ އަބަދުވެސް ކޮރަޕްޝަނެއް ނޯންނާނެއޭ ކޮރަޕްޝަނާ ދެކޮޅަށޭ ވިދާޅުވެ އަންނަ މީހުން އަންނަނީ ދޮގު ވައުދުތައް ވަމުން ކަމަށެވެ. އެހެންކަމުން އެ ދޮގު ވައުދުތަަކަށް ރައްޔިތުން ނޫނެކޭ ބުނަންޖެހޭ ކަމަށާއި އެހެންނޫނީ ގައުމު ސަލާމަތް ނުކުރެވޭނެކަމަށްވެސް އައްސަދު ވަނީ ވިދާޅުވެފައެވެ.

ބަހުސް ކުރިޔަށްދިޔައިރު އައްސަދު ވަނީ އޭނާގެ ސިޔާސަތުތަކާއި ތަސައްވަރުވެސް ހާމަކޮށްދެއްވާފައެވެ.