ރައީސުލްޖުމްހުރިއްޔާ އަދި ނާއިބު ރައީސްވެސް, ދައުލަތަށް ޚަރަދު ކުޑަކުރުމުގެ ގޮތުން ފަސްޓު ކުލާހުގަ ދަތުރު ނުކުރައްވާނެކަމަށް ވިދާޅުވުމަށްފަހު, ޗައިނާއަށް ވަޑައިގެންނެވުމަށް ފަސްޓު ކުލާހުގައި ރައީސް މުއިއްޒު ދަތުރު ކުރެއްވިކަން ހާމަވެއްޖެއެވެ.

ރައީސް މުއިއްޒު ދެމަފިރިކަނބަލުން ޗައިނާއަށް ދަތުރު ކުރައްވާފައިވަނީ ސިންގަޕޯރ އެއަރލައިންސްގެ ފަރސްޓު ކުލާހުގައި ކަމަށް ރައީސް އޮފީހުގެ އޮފިޝަލެއް ނަން ހާމަ ނުކުރުމަށް ބުނެ ވަނީ މައުލޫމާތުދީފައެވެ.

ސިންގަޕޯރ އެއަރލައިންސްގެ ފަސްޓު ކުލާހަކީ ދުނިޔޭގެ އެއަރަލއިންތަކުގެ ތެރެއިން އެންމެ އަގުބޮޑު ކުލާސްކަން ފާހަގަ ކޮށްލެވެއެވެ.

އެގޮތުން ސިންގަޕޯރ އެއަރލައިންގެ ފަސްޓު ކުލާހުގެ ޓިކެޓް އާންމު ގޮތެއްގައި އަގު އުޅެނީ 18 ހާސް އެމެރިކާ ޑޮލަރަށްވުރެ މަތީގައި ކަމަށް ވެސް ދައްކައެވެ.

ރައީސް މުއިއްޒުގެ ދެމަފިރިކަނބަލުން ފަސްޓު ކުލާހުގައި ދަތުރު ކުރައްވާފައިވާއިރު, ބައެއް ވަޒީރުން އިކޮނޮމީ ކުލާހުގައި ދަތުރުކުރައްވާ މަންޒަރު ރައީސް އޮފީހުގެ މިނިސްޓަރ އިބުރާހިމް ޚަލީލުވަނީ ޓުވީޓު ކުރައްވާފައެވެ.

ވެރިކަމުގެ ހުވާ ކުރެއްވުމަށްފަހު, ތުރުކީއަށާއި އެމިރޭޓްސްއަށް ކުރެއްވި ދަތުރުފުޅަށްފަހު އެނބުރި ވަޑައިގެން އެއާޕޯޓުގައި ނޫސްވެރިންނާ ވާހަކަދައްކަވަމުން ފާއިތުވި ޑިސެމްބަރުމަހުގެ 3 ވަނަ ދުވަހު ރައީސް މުއިއްޒު ވިދާޅުވީ އެމަނިކުފާނާއި ނާއިބު ރައީސްގެ ދަތުރުފުޅުތަކުގެ މަޤުޞަދަކީ ދައުލަތުގެ ފައިސާއިން ޚަރަދުކުރެއްވުން ނޫންކަމަށެވެ.

ނަމަވެސް އެމަނިކުފާނާ ނާއިބު ރައީސްގެ ދަތުރުފުޅުތަކުގެ މަޤުޞަދަކީ ރައްޔިތުންނަށް ރަނގަޅު ނަފާވަނިވި ކަންތައްތަކެއް ހާސިލުކުރުން ކަމުގައި ރައީސް ވިދާޅުވިއެވެ.

"އަޅުގަނޑު ބޭނުމެއް ނޫން ފަސްޓު ކުލާހުގައި ދަތުރުކުރާކަށް. ބިޒްނަސް ކުލާހަށްވުރެ މައްޗަށް ދާކަށް ބޭނުމެއް ނޫން. ނައިބުރައީސްވެސް ބޭނުމެއް ނޫން."ފާއިތުވި ޑިސެމްބަރުމަހުގެ 3 ވަނަ ދުވަހު ވެލާނާ އިންޓަރނޭބަނަލް އެއަރޕޯޓުގައި ނޫސްވެރިނާ ވާހަކަ ދައްކަވަމުން ރައީސް ވިދާޅުވިއެވެ.

މިކަމާ ގުޅިގެން ގިނަ ބަޔަކު ރައީސް މުއިއްޒު ސިފަ ކުރައްވަނީ ބަހާއި އަމަލާ ދިމާނުވާ ރައީސެއްގެ ގޮތުގައެވެ