އެމެރިކާއިން އީރާނުގެ އަސްކަރީ މަރުކަޒުތަކަށް ދިން ހަމަލާތަކާ ގުޅިގެން ސައުދީ އަރަބިޔާއިން ކަންބޮޑުވުން ފާޅުކުރައްވައިފިއެވެ.

މިކަމާއި ގުޅިގެން ސައުދީ ފޮރިން މިނިސްޓްރީން ނެރުނު ބަޔާނުގައި ބުނެފައިވަނީ "ސައުދީ އަރަބިޔާއިން އިސްލާމިކް ރިޕަބްލިކް އޮފް އީރާނުގައި ހިނގަމުންދާ ކަންތައްތަކާމެދު، ހާއްސަކޮށް އެމެރިކާއިން އީރާނުގެ ނިއުކްލިއަ ފެސިލިޓީތަކަށް ދިން ހަމަލާއާމެދު ކަންބޮޑުވާ ކަމަށާއި އަދި އެކަންތައް ބަލަމުންދާ" ކަމަށެވެ.

މި ހަމަލާތަކާ ގުޅިގެން ސަރަހައްދުގައި އިތުރު ހަމަނުޖެހުންތަކެއް އުފެދިދާނެކަމުގެ ބިރު އޮތްކަން ފާހަގަކޮށް، ސައުދީން ވަނީ ހުރިހާ ފަރާތްތަކަކަށްވެސް މަޑުމައިތިރިކަމާއެކު ކަންކަން ކުރިއަށް ގެންދިއުމަށް ގޮވާލައިފައެވެ.

އަދި މި މައްސަލައާއި ގުޅިގެން ސިޔާސީ ހައްލެއް ހޯދުމަށް ބައިނަލްއަގުވާމީ މުޖުތަމައުގެ އެހީތެރިކަން ބޭނުންވާނެ ކަމަށް ސައުދީ ސަރުކާރުން ގޮވާލައިފައި ވެއެވެ.

އިތުރަށް ކަންކަން ގޯސްވިޔަ ނުދިނުމަށް މަސައްކަތްކުރުމަށާއި ސަރަހައްދުގެ އަމަންއަމާންކަމަށް ނޭދެވޭ އަސަރުކޮށްފާނެ ފަދަ ހަމަލާތައް ހުއްޓުވުމަށް، ހުރިހާ ފަރާތްތަކުންވެސް ޒިންމާދާރު ގޮތެއްގައި ހަރަކާތްތެރިވުމަށް އެސަރުކާރުން އިލްތިމާޒުކޮއްފައި ވެއެވެ.