ރައީސް އަބްދުﷲ ޔާމީންގެ ފަރާތްޕުޅުން ދިވެހިރާއްޖޭގެ ހައިކޯޓުގައި އިސްތިއުނާފުކޮށްފައިވާ މައްސަލައިގެ އަދާހަމަ ހޯދާލަން މެސެޖުކޮށްލިއިރު އެ ކޯޓުގެ މީޑިޔާ އޮފިސަރ އަމީން ފައިސަލް ރަށުން ބޭރުންގައި ހުރުމުން މައުލޫމާތު ދެވެން ނެތްކަމަށް ވިދާޅުވެއްޖެއެވެ.

ރައީސް އަބްދުﷲ ޔާމީންގެ މައްޗަށް ކުރިމިނަލް ކޯޓުން، ވ. އާރަށުގެ މައްސަލައިގައި ކުރި ހަރާން ހުކުމުގެ އިސްތިއުނާފު މަރުހަލާގެ އަޑު އެހުންތައް ހުކުމާ ހަމައަށް ވާސިލްވެ 3 މަސްވެފައިވާއިރު އަދިވެސް ހުކުމުގެ މަޖިލިސް ތާވަލްނުކޮށް ދަނީ ލަސްކޮށް ފަސްކުރަމުންނެވެ.

އިސްއިތުނާފުގެ މަރުހަލާއަކީ އަވަސްކޮށް ބަލާނިންމަން ޖެހޭ މަރުހަލާއެއް ނަމަވެސް ހައިކޯޓުގެ ފަނޑިޔާރުން ގެންދަވަނީ ތަފާތު އުޒުރުތައް ދައްކަވާ މައްސަލަ ނުނިންމާ ލަސްކޮށް ދިގު ދަންމަމުންނެވެ.

އެގޮތުން ނޮވެމްބަރު މަހުގެ 21 ވަނަ ދުވަހު ފަހު އަޑު އެހުން ބާއްވާ ދެ ފަރާތަށް ވެސް ފަހު ބަސްބުނުމުގެ ފުރުސަތު ދިނުމަށް ފަހު ރިޔާސަތުން ދެން ވިދާޅުވީ، އިތުރު ކަމެއް ސާފުކުރުމަށް ނެތްނަމަ ދެން އޮންނާނީ ހުކުމް ކުރުން ކަމަށެވެ.

އޭގެ ފަހުހް ތިން މަސް ފާއިތުވެގެން ދިޔައިރުވެސް އަދިވެސް މައްސަލައިގެ އިތުރު އަދާހަމައެއް ކޯޓުން ހާމަކޮށްފައިނުވެއެވެ. އެންމެ ފަހުން މައުލޫމާތު ލިބުނު ގޮތުގައި ލަސްވަނީ ލިޔެކިޔުންތައް ޓައިޕްކުރުމުގައި ގިނަ ވަގުތު ނަގާތީއެވެ. ނަމަވެސް ދެމަސް ތިން މަސް ފާއިތުވެގެން ދާއިރު މައްސަލައެއްގެ ލިޔެކިޔުންތައް ތައްޔާރުނުވުމަކީ ކޯޓުގެ މުވައްޒަފުންނާ ފަނޑިޔާރުންގެ ގާބިލުކަމާ މެދުވެސް ސުވާލު އުފައްދަން ޖާގަ ތަނަވަސް ވެގެން ދާ ކަމެކެވެ.

ހައިކޯޓުގެ މީޑީޔާ އޮފިސަރއަށް ރައީސް ޔާމީންގެ މައްސަލައިގެ އަދާހަމަ ހޯދާލަން ޗެނަލް13އިން މެސެޖު ކުރުމުން ވިދާޅުވީ އޭނާ ހުންނެވީ ގައުމުން ބޭރުގައި ކަމަށާ އެހެންކަމުން ޖަވާބެއް ދެއްވޭނީ އާދިއްތަ ދުވަހު ކަމަށެވެ.

އަދާހަމަ ލިބޭނެ އެހެން ގޮތެއް ނީންނާނެ ތޯ ސުވާލުކުރުމުން ވިދާޅުވީ ބަލާލާފައި އެބަ ޖަވާބެއް ދެއްވާ ކަމަށެވެ. ނަމަވެސް އަދި ވަކި ޖަވާބެއް ލިބިފައިނުވެއެވެ.

ރައީސް ޔާމީންގެ މައްޗަށް ހަރާން ހުކުމެއް އިއްވާ 1194 ދުވަސް ފާއިތުވެފައިވާއިރު އެ ހުކުމުގެ ސަބަބުން އެމަނިކުފާނުގެ އެތައް ހައްގެއް ވަނީ ގެއްލިފައެވެ. މިކަމުގެ ކަންބޮޑުވުން އެމަނިކުފާނުގެ ވަކީލުން ފާޅުކުރައްވައެވެ.

ރައީސް މުހައްމަދު މުއިއްޒު ރިޔާސީ އިންތިހާބުގައި ވައުދުވެ ވަޑައިގެންނެވީ ރައީސް ޔާމީން މިނިވަންކުރާނެ ކަމަށް ނަމަވެސް އަދިވެސް އެ ވައުދު ނުފުއްދައެވެ. މިހާރު ވިދާޅުވަނީ ޖުޑީޝީއަރީ ވާނީ މިނިވަންކޮށްފައި ކަމަށާ ގާނޫނި ހަމަތަކުގެ މަތިން އެމަނިކުފާނު މިނިވަންވާނެ ކަމަށެވެ.