2013 ވަނަ އަހަރުގެ އިންތިހާބު ކާމިޔާބު ކުރުމުން ރައީސް އަބްދުﷲ ޔާމީނަށް ހިންދެމިލަން ވަގުތުކޮޅެއް ނުދީ އިދިކޮޅު އެމްޑީޕީން ޤައުމު ހަލަބޮލިކޮށް ރާއްޖޭގެ ސިޔާސީ މަސްރަހު ބަނަކުރުމަށް ތަފާތު އެތަކެއް މަސައްކަތެއް ކުރިއެވެ.

ސަރުކާރާއި މެދު ރައްޔިތުންގެ ހިތްތަކުގައި ރުޅިވެރިކަމާއި ނަފުރަތުކަން އުފެއްދުމަށްޓަކައި ފިސާރި މޮޅެތި ޕްލޭންތައް ހަދައި ތަފާތު މޮޅެތި ބަސްތައް ހަދާ ސަރުކާރަށް ޖޯކު ޖެހުމުގައި ހިތުން ފިސާރި ކާމިޔާބެއް ކަމުގައި ދެކިގެން މަސައްކަތްފެށިއެވެ.

އިދިކޮޅު ވާހެން ހިވާ އެންމެން އެއްކޮށްގެން ޤައުމު ހަލަބޮލިކޮށް އަސްލެއް، ފޭކެއް ނޭނގޭވަރަށް ފާޓު ފުޅާ ހައެއްކަ ކޯލިޝަން ހަދާ ، ވެރިކަން ބަދަލުކުރަން ވެސް ތަކުރާރުކޮށް އެކި ގޮތް ގޮތުން މަސައްކަތްކުރީ ތިޔަހެން ބުނެފައެވެސް ނޫނެވެ.

ރައީސް ޔާމީނުގެ ސަރުކާރު އައުމާއި އެކު، އެންމެ ފުރަތަމަ މިބައި މީހުން ގޮވަން ފެށީ ތަރައްޤީއެއް ގެންނާކަށް ނޭގެ ވާހަކައާއި، އިގްތިސޯދު ކުރަން ނޭނގޭ ވާހަކައެވެ. އެއީ ބަރަވެލި ސްޕީޑުގަ ހިނގަމުންދިޔަ ސަރުކާރެއްކަމާއި، ބަރަވެލި ސްޕީޑްގެ ވާހަކައެވެ. އޭރުގެ އިދިކޮޅު ކޯލިޝަނުން ދިވެހިންގެ ހިތްތަކަށް ވައްދަން އުޅުނީ އެއީ ސްލޯ މޯޝަން ސަރުކާރެއްގެ ގޮތުގައެވެ.

އަނެއްކާވެސް އެމްޑީޕީއިން މިވަނީ ހަމަ އެ މަސައްކަތް އެ އުސޫލުން ފަށާފައެވެ. ވަގަށް ނަގައިގެން ވަރަށް ބާރަށް ބަގުޑި ބައްދައިގެން ތިބި ވެރިކަމެއް، ރައްޔިތުން ނުކުމެ ވޯޓުން ދަމާ އަތުލައިގަތުމުން ހަޖަމް ނުވެގެން ނުކުމެ ކުރިން ކީ އަންބާ އަނެއްކާވެސް ކިޔަން ފަށައިފިއެވެ.

މަޖިލިސް އިންތިހާބާ ދިމާކޮށް ރައްޔިތުންގެ ބޯ ނިކަން ރަގަޅަށް ކާލާނަމޭ ހިތާ އެމްޑީޕިއިން ދައްކަން ފެށީ ގައުމުގެ ދަރަނީގެ ވާހަކައެވެ. އިގްތިސޯދު އޮތް ހާލަތުގެ ވާހަކައެވެ. ދަރަނި ފިލުވަން ރައީސް މުހައްމަދު މުއިއްޒުއަށް ނޭނގޭ ކަމަށް ބުނެ ނިކަން ހަޖޫ ވެސް ޖަހަމުން އެބަ ގެންދެއެވެ.

މިހާ ހިސާބުން އަހުރެން ހިތަށް އެރީ އިބްރާހިމު މުހައްމަދު ސޯލިހުއަކީ ގަމާރެކޭ މީހުން ބުނަނީ ހަމަ ބުނަން ޖެހިގެން ކަމެވެ. އެހެނީ މީނާ ނުކުމެ ހިތުން މޮޅުތަކެއް ވާނެކަމަށް ހިތާ މި ދައްކާ ދަރަންޏާ އިގްތިސޯދާ ކޮރަޕްޝަންގެ ވާހަކައަކީ އަޅެ ފަހެ މީނާގެ ވެރިކަމުގައި ހާވާފައި ހުރި ހަޑިކަމެއް މީނާއަށް ހަމަ ނޭގޭތީއެވެ.

ގައުމު އަރަނީގައި ރައީސް ޔާމީންގެ ވެރިން ނިމުނު އިރު އޮއްވާ ދަރަނީގެ ހާއްޔަކަށް ހެދީ އަޅެ ފަހެ ކާކުބާއެވެ؟ އާއިލީ ވެރިކަމެއްގެ ތެރެއިން އެންމެންނަށް ދިން މަގާމުތަކާ ނުވިތާކަށް ވަކި ގައުމެއް ރުއްސަން ގޮސް އެމީހުންގެ އުނގުތެރެއަށް ވެއްޓި ތުން ބޯ އޮތީ މުޅި ގައުމުގެ ވަތު ބަތާނަށްއަށް ދާންދެން ހިބައިން އެމީހުންނަށް ދީގެންނެވެ.

ހިލޭ އެހީ އޭ ކިޔާ ހޯދީ ދަރަނީގެ ބޮޑެތި ތަކުލީފުތައް ކަން މިހާރު ހާމަވަމުންދާއިރު ރައީސް މުއިއްޒުއަށް ދަރަނި ފިލުވަން ނޭނގެއޭ ގައުމު ހިންގަން ނޭނގެއޭ ކިޔާ އިބްރާހިމު މިހިރަ ތާޅަފިލި ފުމެނީ ހަމައިގައި ހުރެގެންބާއެވެ؟

ނިމިދިޔަ ފަސް އަހަރު އެމްޑީޕީއިން ނިންމާލީ ގައުމީ ސަލާމަތަށް ނުރައްކަލުގެ ރަނގަބީލު ޖަހަމުން ކަންކަން ސިއްރުކުރަމުންކަން މީނާއަށް ހަމަ ނޭނގެނީބާއެވެ؟ ނޫނީ އެއީ މީނާ ހިނދުކޮޅެއްގައި ހުއްޓާ ވެގެން ގޮސްފައިވާ ކަމެއް ބާއެވެ؟

އެއްބަސްވުމެއް ހެދިޔަސް ސިއްރެވެ. ލޯނެއް ނެގިޔަސް ސިއްރެވެ. ހުރިހާ ކަމެއްގެ ފަހަތުގައި އޮތީ ކޮރަޕްޝަނާ ވައްކަމާ ފަސާދައެވެ.

މިިހާރު މި އުޅެނީ މަޖިލިސް ނުލިބިދާނެތިއެވެ. އަދި ކެޔޮ ކޭ ވަރު ބަލަން ބިތު ފަންގި ނަގަމުން އޭސީސީއިން ގެންދަން ފެށުމުން ކިޔާފާ ނުކިޔާނެ އެއްޗެއް ނޭނގިގެން ކޮކަޑި ކޭ މީދަލެއް ހެން އެނބުރެނީއެވެ. ކަލޯއެވެ. އެ ދުވަހުވެސް އަހަރުމެން ބުނީމެއް ނޫން ހެއްޔެވެ. ވަގަކަށް ހާސް ދުވަހެވެ. ވެރިޔަކަށް އެއް ދުވަހެވެ. މިއަދު މީ ރައްޔިތުންގެ ދުވަހެވެ. ފަސް އަހަރު ނިކަން ނާޗަރަންގީ އަހަރުމެންގެ ފައިސާއިން ކުޅެފީމެއް ނޫން ހެއްޔެވެ. ނިކަން އައްޔާޝީ ކޮށްފީމެއް ނޫންހެއްޔެވެ.

ދެން ވެސް އަނގަ މަޑު ލައިގެން ހުރުން ބުއްދި ވެރިއެވެ. މުޅި ގައުމު ދަރުވާ ހަފުސް ކުރުމަށް ފަހު ނުކުމެ އަނގަ ފުޅާ ކުރަން އަޅެ ފަހެ ލަދެއްވެސް ނުގަނޭ ހެއްޔެވެ. އުނު އޮރިޔާން ހިޔާކުރަނީ ލަދަށޭ ގައިމު ބުނާ އަޑު އަހަމު ވިއްޔާއެވެ!