މަޖިލީހުގެ ސުޕަ މެޖޯރިޓީ ސަރުކާރަށް އޮތް ނަމަވެސް ރައީސް މުހައްމަދު މުއިއްޒަށް ތާއީދުކުރާ ތިބީ މަދު ޕީއެންސީ މެމްބަރުންތަކެއް ކަމަށް ވެލިދޫ ދާއިރާގެ މަޖިލިސް މެބްބަރު މުހައްމަދު އައްބާސް ވިދާޅުވެއްޖެއެވެ.
އައްބާސް މިފަދައިން ވިދާޅުވެފައިވަނީ ރާއްޖެ ޓީވީގެ ޕްރޮގްރާމެއްގައި ވާހަކަ ދައްކަވަމުންނެވެ.
އައްބާސް ވިދާޅުވީ ނ. އަަތޮޅަށް ކުރެއްވި ދަތުރުފުޅުގައި ފެނިގެން ދިއަ މަންޒަރުތަކުން ރައީސް މުއިއްޒަށް މި ގައުމުގައި ތާއީދެއް މިހާރު ނެތްކަން ވަރަށް ރަނގަޅަށް ހާމަވެއްޖެ ކަމަށެވެ. މިއަދު މި ގައުމުގައި ރައީސް މުއިއްޒަށް ތާއީދު ކުރާ އެންމެ 10 ޕަސެންޓް މީހުން ވެސް ނެތް ކަމަށްވެސް އައްބާސް ވިދާޅުވިއެވެ.
ސަރުކާރުގެ މިނިސްޓަރުން ފެންވަރުގެ ބޭފުޅުންގެ ތެރޭގައި ވެސް ރައީސްގެ ސިޔާސަތުތަކަށް ފާޑު ކިޔުއްވާ ބޭފުޅުން ތިއްބަވާކަން ހާމަކުރައްވާ އައްބާސް އިތުރަށް ވިދާޅުވީ، ސަރުކާރުގެ ސުޕަ މެޖޯރިޓީ އޮތް މަޖިލިސް މެމްބަރުންގެ ތެރެއިން ވެސް ރައީސް މުއިއްޒަށް ތާއީދު ކުރަނީ އެންމެ 15 ވަރަކަށް މެމްބަރުން ކަމަށެވެ.
އެގޮތުން 75 މެމްބަރުން ސަރުކާރު ތަމްސީލުކުރަން ޕީއެންސީގެ ފަރާތުން މަޖިލީހުގައި ތިބި ނަމަވެސް ފާޅުގައި ގިނަ މެމްބަރުން މި ސަރުކާރުގެ ކަންކަން ގޯސް ވާހަކަ ދައްކަމުން އަންނަ ކަމަށް ވެސް އޭނާ ވިދާޅުވިއެވެ.
އައްބާސް އިތުރަށް ވިދާޅުވީ ރައީސް މުއިއްޒަށް މިހާރު އެމަނިކުފާނަށް ތާއިދު ސަރުކާރުތެރޭގައި ނެތްކަން ހާމަވާ ކަމަށާ އެމަނިކުފާނަށް މިއަދު ގޮތް ހުސްވެފައިވާ ކަމަށެވެ.
