ފަލަސްތީނުގެ ގުދުސްގައި ހުންނަ އަލް-އަޤްސާ މިސްކިތް ކައިރީގައި ތިބި ބަޔަކަށް ނިރުބަވެރި އިސްރާއީލުން ހަމަލާތަކެއް ދީފިއެވެ.

ރިޕޯޓްތަކުން ބުނާ ގޮތުގައި ނިރުބަވެރިން ހަމަލާދިފައިވަނީ އަޅުކަމަށް މިސްކިތަށް ގޮސް އުޅުނު މީހުންނަށެވެ.

ނިރުބަވެރިން މިފަދަ ހަމަލާއެއް ދީފައިވާއިރު، ހަމަލާދޭ މަންޒަރު ފެންނަ ވީޑިއޯތަކެއް ވެސް މިހާރު މީސްމީޑިއާގައި އަންނަނީ ދައުރުވަމުންނެވެ.

އެގޮތުން ދައުރުވަމުން އަންނަ ވީޑިއޯތަކުން މިސްކިތް ސަރަހައްދުގައި ތިބި މީހުންނަށް އިސްރާއީލުގެ ސިފައިން ހުރަސް އަޅާ މަންޒަރާއި، ހަމަލާދޭ މަންޒަރު ފެނިގެންދެއެވެ.

ބައެއް ރިޕޯޓްތަކުން ބުނާ ގޮތުގައި ނިރުބަވެރިން ވަނީ އަޤްސާ މިސްކިތް ކައިރިއަށް މަޑުކޮށް، އެސަރަހައްދުގައި ތިބި މީހުން ބަލައި ފާސްކޮށް، ހައްޔަރު ކުރަން ވެސް މަސައްކަތް ކޮށްފައެވެ.

ނަމަވެސް އެއްވެސް މީހަކު ހައްޔަރު ކުރި ކަމުގެ ރިޕޯޓެއް އަދި ރިޕޯޓްތަކުން ކޮސްފައެއް ނުވެއެވެ.

ހުކުރު ދުވަހާއި ދިމާކޮށް، އަޤްސާ މިސްކިތަށް ގިނަ ބަޔަކު ޖަމާވާނެކަން އެނގިތިބެ އިސްރާއީލް ސިފައިން މިފަދަ އަމަލެއް މިއަދު ހިންގާފައިވާއިރު، މިއީ މިފަދަ ގޮތަކަށް އަޤްސާ މިސްކިތަށްދާ ފަރާތަކަށް ނިރުބަވެރިން ހުރަސް އަޅަމުން އަންނަތާ ޖެހިހެގެން 20 ވަނަ ހުކުރު ދުވަސްކަން ވެސް ފާހަގަ ކޮށްލެވެއެވެ.