ދައުލަތުގެ ޚަރަދުކުޑަ ކުރަން ސަރކިއުލާރއެއް ނެރުއްވާ އެންގެވުމަށް ފަހު ރައީސް މުހައްމަދު މުއިއްޒު އެއަށް އަމަލުނުކުރައްވާކަން ހާމަވެއްޖެއެވެ.

އެގޮތުން ރައީސް މުއިއްޒު ރާއްޖޭގެ އުތުރުގެ އަތޮޅުތަކަށް ބޮޑު ވަފުދަކާއެކު ދަތުރުފުޅު ފެއްޓެވިއިރު އެ ދަތުރުފުޅަށް އެކަނި ވެސް ދައުލަތުގެ މާލިއްޔާއިން އެތައް މިލިއަނެއް ޚަރަދުވާނެކަން ވަނީ ހާމަވެފައެވެ.

ޖުމްލަ 47 ބޭފުޅުންގެ ބޮޑު ވަފްދަކާއެކު މުއިއްޒު އުތުރުގެ ރަށްތަކަށް ދަތުރު ފައްޓަވާފައިވާއިރު, އިއްޔެ ފިނޭންސް މިނިސްޓްރީންވަނީ، ދައުލަތުގެ ޚަރަދު ކުޑަކުރުމުގެ ގޮތުން، އައު ވަޒީފާތަކަށް މީހުން އައްޔަން ނުކުރުމަށާއި، މުސާރަތައް ބޮޑު ނުކުރުމަށާއި، އަދި އޮފީސްތަކުން ކުރާންޖެހޭ ގިނަ ދަތުރުތައްވެސް މަޑުޖައްސާލުމަށް ދައުލަތުގެ ހުރިހާ މުވައްސަސާތަކަށް އަންގާފައެވެ.

ނަމެސް، ފިނޭންސް މިނިސްޓްރީ މެދުވެރިކޮށް، ދައުލަތުގެ އެހެން ހުރިހާ އޮފީސްތަކަށް ދަތިވާނެހެން ސަރކިއުލަރ ނެރުވާ ބަޖެޓް ހިފެހެއްޓުމަށްފަހު ރައީސް މުއިއްޒު 47 މީހުންގެ ވަފްދަކާއެކު ރާއްޖޭގެ އުތުރުގެ ރަށްތަކަށް ފެއްޓެވި ދަތުރުފުޅުގައި ދައުލަތުގެ ބަޖެޓުން 5 މިލިއަނަށްވުރެ ބޮޑު އަދަދެއްގެ ފައިސާ ޚަރަދުވާނެކަމަށް ވަނީ މައުލޫމާތު ލިބިފައެވެ.

އެހެންކަމުން ދައުލަރުގެ ޚަރަދުތައް ކުޑަ ކުރުމަށް ސަރުކާރުން މި ގެންގުޅެނީ ދެކޮޅު ނުޖެހޭ ސިޔާސަތެއް ކަމަށް ބުނުމުގެ ޖުާގަ ތަނަވަސް ވެގެން ދެއެވެ. އަދި މިކަމުގެ ސަބަބުން ސަރުކާރަށް މިހާރުވެސް އަމާޒުވަމުން ދާ ނުރުހުން އިތުރުވެގެން ދާނެ ކަމަށް ލަފާކުރެވެއެވެ.

ރައީސް މުއިއްޒު ދައުލަތުގެ މާލިއްޔާ މިހާ ބޮޑު ހޭދައެއް ކުރައްވައިގެން މިހާރު ކުރައްވަމުން ގެންދަވާ ދަތުރުފުޅުތަކަކީ ކުރިއަށް އޮތް ރައްޔިތުންގެ މަޖިލީހުގެ ކެމްޕެއިނަށް ކުރައްވަމުން ގެންދަވާ ދަތުރުފުޅުތަކެއްކަން ހާމަވާން އޮތް އިރު ވެސް، ދައުލަތުގެ މުދަލާއި ފައިސާ ބޭނުންކޮށްގެން ރައީސުލްޖުހޫރިއްޔާ ހިންގަވަމުންދާ ކޮރަޕްޝަނަށް މަގު ފަހިވާކަންކަން ބެލުމުގައި އެންޓި ކޮރަޕްޝަން ކޮމިޝަން އޮތީ ފަހަތު ފަޔަށް ބުރަވެފައިކަން ފާހަގަކޮށްލެވެއެވެ.