ރައްޔިތުންގެ މަޖިލީހަށް މެމްބަރުން އައްޔަން ކުރުމަށް ބާއްވާ އިންތިހާބުގެ ތާރީޚު ފަސްނުކުރާކަން ހާމަވެއްޖެއެވެ.

އެގޮތުން އިލެކްޝަންސް ކޮމިޝަން އިން ވަނީ އެ އިންތިހާބާ ދިމާކޮށް ކައުންޓް ޑައުނެއް ފަށާފައެވެ. އެކްސް ހެންޑްލްގައި މިއަދު ފެށި އެ ކައުންޓް ޑައުންގައި ފެންނަ ގޮތުން އިންތިހާބަށް ބާކީ އޮތީ 21 ދުވަހެވެ. އެހެންކަމުން އިންތިހާބުގެ ތާރީހު އަދިވެސް ފަސްނުކުރާކަން މިވަނީ ހާމަވެފައެވެ.

އިންތިހާބުގެ ތާރީޚު ފަސްނުކޮށްވާއިރު މިކަމާ ގުޅިގެން އީސީއިން މީގެ ކުރިން ހާމަކޮށްފައިވާ ގޮތުގައި ތާރީހު ފަސްކުރެވެނީ ގާނޫނަށް އިސްލާހު ގެނެސްގެންނެވެ. މިހާރު ރައްޔިތުންގެ މަޖިލީހުން ވަނީ އިންތިހާބު ތަކާ ބެހޭ ގާނޫނަށް ރޯދަ މަހު ތެރޭގައި އެއްވެސް އިންތިހާބެއް ނުބޭއްވޭނެހެން އިސްލާހު ގެނެސްފައެވެ.

ނަމަވެސް މަޖިލިސް އިންތިހާބުގެ ތާރީޚު ފަސްނުކޮށް އީސީއިން ކައުންޓް ޑައުން ފަށާފައިމިވަނީ އެ ބިލް ތަސްދީގުކުރަން ރައީސުލްޖުމްހޫރިއްޔާއަށް ފޮނުއްވާ މުއްދަތު ހަމަވާން ހަތަރު ދުވަހަސްވުރެ ވަގުތު ކުޑަތަން ވެފައި ވަނިކޮށެވެ.

ރޯދަ މަހު އިންތިހާބު ބޭއްވުމަކީ އާންމުންނާ ގިނަ ސިޔާސީ ޕާޓިތަކުގެ ވެސް ކަންބޮޑުވުން އޮތް ކަމަކަށްވުމުން މަޖިލީހުގެ މެޖޯރިޓީ އެމްޑީޕީއިން ވަނި އިންތިހާބާ ބެހޭ ގާނޫނަށް އިސްލާހު ގެެނސް ފާސްކޮށްފައި ނަމަވެސް ރައީސް މުއިއްޒުވަނީ އިންތިހާބު އޮންނާނީ ރޯދަ މަހު ކަމަށް ދޭހަވާފަދަ މޭރުމަކުން ބައެއްހަފްލާތަކުގައި ވާހަކަފުޅު ދައްކަވާފައެވެ.

ބިލު ތަސްދީގު ކުރަން އޮތް މުއްދަތު މި ހަފްތާގެ ބުދަ ދުވަހަށް ހަމަވާއިރު ރައީސް މުއިއްޒު އެ ބިލު ތަސްދީގު ކުރެއްވުމެއް ނެތި އަވަދިނެތި އުޅުއްވަނީ ދައުލަތުގެ މުދަލާ ފައިސާ ބޭނުންކޮށްގެން މަޖިލިސް އިންތިހާބުގެ ކެމްޕެއިންގައިކަން ފާހަގަކޮށްލެވެއެވެ.