އިންޑިއާގެ ވިޔަފާރި ކުންފުނި ޓާޓާއިން ނިރުބަވެރި އިސްރާއީލަށް ހަތިޔާރު ދޭތީ އިންޑިއާގައި މުޒާހަރާކޮށްފިއެވެ.
މި މުޒާހަރާތަކުގެ ތެރެއިން ދިއްލީގެ ކަމްލާ ނަގަރު ސަރަހައްދުގައި ކުރެވުނު ފާހަގަކޮށްލެވޭ މުޒާހަރާވެސް ހިމެނެއެވެ.
މުޒާހަރާ ކުރި ފަރާތްތަކުން ވަނީ "ފަލަސްޠީނަށް މިނިވަންކަން" މިހެން ލިޔެފައިވާ ޕްލެކާޑުތަކާއެކު އަޑުގަދަކޮށް ގޮވަމުން، ޓާޓާ ގްރޫޕުން އިސްރާއީލާއެކު އޮތް ދިފާއީ އަދި ވިޔަފާރީގެ ގުޅުންތަކުގެ ސަބަބުން ޣައްޒާގައި އިސްރާއީލުގެ އަސްކަރީ ޢަމަލުތަކަށް އެހީތެރިވާކަމަށް ތުހުމަތުކޮށްފައެވެ.
މި މުޒާހަރާތަކަކީ ޓާޓާގެ ފެޝަން ޗެއިން ބޮއިކޮޓްކުރުމަށް ގޮވާލުމަކީ، މިހާރު ކުރިމަތިވެފައިވާ އިންސާނީ ކާރިސާގައި ކުންފުނިތަކުގެ ބައިވެރިވުން ހުއްޓުވުމަށް އެދި އެކްޓިވިސްޓް ގްރޫޕުތަކުން ހިންގަމުންދާ ފުޅާ ކެމްޕޭނެއްގެ ބައެކެވެ.
މި މުޒާހަރާތަކަކީ ހަމައެކަނި ދިއްލީއަށް ޚާއްސަ ހަރަކާތެއް ނޫނެވެ. މުޅި ޤައުމަށް ފެތުރިފައިވާ މި ހަރަކާތުގެ ތެރެއިން ހައިދަރާބާދު، ޕޫނެ އަދި މުންބާއީ ފަދަ ސިޓީތަކުގައިވެސް މިފަދަ މަންޒަރުތައް ފެނިފައިވެއެވެ.
މުޒާހަރާކުރި ފަރާތްތަކުން ވަނީ މަގުމަތީގެ ޕަރފޯމަންސްތަކާއި ބެނަރުތައް ބޭނުންކޮށްގެން އެމީހުންގެ މަޤްޞަދަށް ސަމާލުކަން ގެނައުމަށް މަސައްކަތްކޮށްފައެވެ. އެމީހުން ދުނިޔޭގެ ހަނގުރާމަތަކާ ގުޅިފައިވާ ބްރޭންޑްތަކަށް ދޭ އެހީތެރިކަމާމެދު އަލުން ވިސްނުމަށް ކަސްޓަމަރުންނަށް ގޮވާލާފައިވެއެވެ.
މި މުޒާހަރާތަކުގެ ސަބަބުން އިންޓަރނެޓުގައި ގަދަ ރައްދުތަކެއް އައިސްފައިވެއެވެ. ބޮއިކޮޓްކުރުމަށް ތާއީދުކުރާ ފަރާތްތަކާއި އޭގެ ނަތީޖާއާމެދު ސުވާލު އުފައްދާ ފަރާތްތަކުގެ މެދުގައި ޢާންމުންގެ ޚިޔާލު ދެބައިވެފައިވެއެވެ.
