މުއިއްޒުގެ ސިޔާސަތުތަކުގެ ސަބަބުން ގައުމު ފަހަތަށް ޖެހި މިދަނީ ހުދުމުހުތާރު ވެރިކަމަކާއި ދިމާލަށް ކަމަށް ޕީއެންއެފްގެ ސެކްރެޓަރީ ޖެނެރަލް މުހައްމަދު މަލީހް ޖަމާލް ވިދާޅުވެއްޖެއެވެ.

މީޑިއާ ކޮންޓްރޯލް ބިލާއި މެދު ކަންބޮޑުވުން ފާޅުކުރައްވާ އެކްސްގައި ކުރެއްވި ޕޯސްޓެއްގައި މަލީހް ވިދާޅުވީ މުއިއްޒު އަންނަނީ ގައުމުގެ މިނިވަން ނޫސްވެރިކަން ފިއްތާލާ މުއިއްޒުގެ އަތް މައްޗަށް ހުރިހާ ބާރެއް ނެގުމަށް ގައުމު އެ ފުށް މި ފުށަށް ޖަހަމުން ކަމަށެވެ.

މީގެ އިތުރުން، މުއިއްޒު ފަދަ ޑޮކްޓޯރަލް ޑިގްރީއެއް ހައްދަވައިގެން ހުރި ބޭފުޅަކު މިކަހަލަ ދޯހަޅި ސިޔާސަތުތަކެއް ގައުމުގައި ގާއިމުކުރަން މަސައްކަތް ކުރުމަކީ މި ގައުމުގައި "ޑިކްޓޭޓަރޝިޕް" ވެރިކަމެއް މުއިއްޒު ކުރުމަށް ބޭނުންވާ ކަމުގެ މިސާލެއް ކަމަށް މަލީހް ސިފަކުރެއްވިއެވެ.

މަލީހްގެ ޕޯސްޓްގައި މުއިއްޒު ޕީއެޗްޑީ ހެއްދެވި ލީޑްސް ޔުނިވާސިޓީ ޓެގް ކުރައްވާ ވިދާޅުވީ މުއިއްޒުއަކީ އެ ޔުނިވާސިޓީގެ ކުރީގެ ދަރިވަރެއް ކަމަށް ބުނަން އެ ޔުނިވާސިޓީއިންވެސް ލަދުގަންނާނެ ކަމަށެވެ.

މީޑިއާ ކޮންޓްރޯލް ބިލާއި ގުޅިގެން ގިނަ އަދަދެއްގެ ނޫސްވެރިން އަންނަނީ ސަރުކާރަށް ފާޑުކިޔާ މުޒާހަރާތައް ކުރަމުންނެވެ.