އަބުރު ރައްކާތެރިކުރުމުގެ ނަމުގައި މީޑިޔާތައް ކޮންޓްރޯލުކުރަން ސަރުކާރު އަޑީގައި އޮވެގެން ބިލެއް ހުށަހަޅައިގެން ދައްކަމުން ގެންދާ ވާހަކަތަކަށް ރައީސް އަބްދުﷲ ޔާމީން ރައްދު ދެއްވައިފިއެވެ.
ޕީއެންއެފްގެ ޓައުން ހޯލު ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، އަބުރު ރައްކާތެރިކުރުމުގެ ނަމުގައި ބިލެއް ހުށަހަޅައިގެން މަސައްކަތްކުރަމުން ދަނީ ވެރިކަމުގައި ތިބެ ކުރަމުންދާ ވައްކަންތައް ހާމަކުރަމުންދާތީ އެކަންކަން ހުއްޓުވުމަށް ކަމަށެވެ.
ރައީސް ޔާމީން ވިދާޅުވި، ރައްޔިތުންގެ ޚާދިމުންގެ ގޮތުގައި ތިބެ ގޯސްކޮށް ކަންކަންކުރާނަމަ އެ ވާހަކަ ދައްކާނެ ކަމަށާ މީޑިޔާތަކުން އެ އިއްވަނީ ރައްޔިތުންގެ އަޑު ކަމަށެވެ.
ރައީސް ޔާމީން ވިދާޅުވީ، ޕީއެންސީއިން ވެރިކަމަށް އައި ގޮތް ހަނދާނަށް ގެންނާނެ ނަމަ އެންމެ ގިނައިން ފެންނާނީ މީހުންގެ އަބުރަށް އަރައިގެންފައިވާ މަންޒަރު ކަމަށާ އެހެންކަމުން މިއަދު އަބުރުގެ ވާހަކަ ދެއްކުމަކީ އުޒުރެއް ކަމަށެވެ.
ރައީސް ޔާމީން ވަނީ މީޑިޔާ ރެގިއުލޭޓުކުރުން މީޑިޔާއަށް ދޫކޮށްލަން ގޮވާލައްވާފައެވެ.
