އެމެރިކާގެ ރައީސް ޖޯ ބައިޑަން ހޯމަ ދުވަހު ވިދާޅުވީ އަންނަ ހަފްތާ ތެރޭގައި އިސްރާއީލާއި ހަމާސްއާ ދެމެދު އެއްބަސްވުމެއް އުފެދިދާނެ ކަމަށް އުންމީދު ކުރައްވާ ކަމަށާއި، މި އެއްބަސްވުމުގައި ޣައްޒާގައި ހިނގަމުންދާ ހަނގުރާމަ ވަގުތީ ގޮތުން މަޑުޖައްސާލުމާއި، ބަދަލުގައި ޣައްޒާގައި ބާކީ ތިބި ގިނަ ރަހީނުން ދޫކޮށްލުމުގެ ފުރުސަތު އޮތް ކަމަށެވެ.
ޣައްޒާ ހަނގުރާމަ ހުއްޓާލާނީ ކޮން އިރަކުތޯ ހޯމަ ދުވަހު ސުވާލު ކުރުމުން ބައިޑަން ވިދާޅުވީ ހަފްތާ ބަންދު ނިމޭއިރު އެކަމަށް އުންމީދު ކުރައްވާ ކަމަށެވެ. "ގައުމީ ސަލާމަތާ ބެހޭ ލަފާދޭ އެޑްވައިޒަރ އަހަރެން ގާތު ބުނީ ހަނގުރާމަ ހުއްޓާލުން ވަރަށް ގާތްކަމަށް، ނަމަވެސް އަދި ޑީލަކާ ހަމައަށް ނާދެވޭ. އަހަރެންގެ އުންމީދަކީ އަންނަ ހޯމަ ދުވަހުގެ ނިޔަލަށް އަހަރެމެންނަށް ހަނގުރާމަ ހުއްޓާލެވުން." ބައިޑަން ވިދާޅުވިއެެވެ.
ޣައްޒާ ހަނގުރާމައަށް 5 މަސް ވީއިރު ފަލަސްތީނުގެ ގާތްގަނޑަކަށް 30،000 މީހުން ޝަހީދުވެފައިވާ ކަމަށް ޣައްޒާގެ ހެލްތު މިނިސްޓްރީން ހާމަކޮށްފައިވެއެވެ. އިސްރާއީލުން ބަދަލު ހިފުމުގެ ކެމްޕޭން ޣައްޒާގައި ފެށީ އޮކްޓޯބަރު މަހުގެ ހަތް ވަނަ ދުވަހު އިސްރާއީލާއި ޣައްޒާގެ ބޯޑަރު ފެންސް ތެރެއިން ހަމާސްގެ ހަނގުރާމަވެރިން ވަދެ 1،200 މީހުން މަރާލައި ހިންގި ތޫފާން އަގްސާ އޮޕަރޭޝަންއާ ގުޅިގެންނެވެ. މި އޮޕަރޭޝަންގައި ގާތްގަނޑަކަށް އިސްރާއީލުގެ 250 މީހުން ހަމާސްއިން ހައްޔަރު ކުރިއެވެ.
ހަނގުރާމަ ހުއްޓާލުމުގެ އެއްބަސްވުމަކަށް އަތުވެއްޖެނަމަ އެ އެއްބަސްވުމުގެ މުއްދަތު ހަމަވުމުން ވެސް ހަނގުރާމަ ކުރިއަށް ގެންދިއުމަށް އިސްރާއީލުން ވަނީ ވައުދުވެފަ އެވެ.
