މީޑިއާ ކޮންޓްރޯލް ބިލު ފާސްކުރުމަށް ސަރުކާރުން މަސައްކަތް ކުރަމުންދަނީ ސަރުކާރުން ހަދަމުންދާ ބޮޑެތި ގޯސްތައް ރައްޔިތުންނަށް ތިލަވާން ފެށުމުންކަމަށް ރައްޔިތުންގެ މަޖިލީހުގެ ކަނޑިތީމު ދާއިރާގެ މެމްބަރު އަމީން ފައިސަލް ވިދާޅުވެއްޖެއެވެ.

ސަންގު ޓީވީގެ ޕްރޮގްރާމެއްގައި ވާހަކަދައްކަވަމުން އަމީން ވިދާޅުވީ ސަރުކާރުން ހިންގަމުންދާ ވައްކަމާއި ކޮރަޕްޝަންފަދަ ބޮޑެތި ގޯސްތައް މީޑިއާގެ ޒަރީއާއިން ތިލަކުރަމުންދާތީ އާއި ރައްޔިތުންގެ ޓެކްސް ފައިސާއާއި ދައުލަތުގެ އާމްދަނީ ނަހަމަ ގޮތުގައި ބޭނުން ކުރެވެމުންދާ ކަމަށާއި، އެ ވާހަކަތައް ރައްޔިތުންނާ ހަމައަށް ގެނެސްދިނުން ހުއްޓުވުމަކީ މި ބިލުގެ މަޤްސަދެއް ކަމަށެވެ.

މިއާއިއެކު، ކުރިއަށް އޮތް ލޯކަލް ކައުންސިލް އިންތިޚާބާއި ދިމާކޮށް މި އިންތިޚާބު ބޮޑު ތަނުން ކާމިޔާބުކުރުމަށް މުއިއްޒު ރަށްރަށަށް ވަޑައިގެން ގިނަ މަޝްރޫއުތަކުގައި ސޮއިކޮށް، ކޮންމެ ރަށެއްގައި އޭޓީއެމްތައް ހުޅުވަމުން އަންނާތީ އަމީން ވިދާޅުވީ މިކަންކަމުންވެސް ހާމަވަނީމަޝްރޫއުތައް ހުއްޓިފައި ހުރީ ބަޖެޓުގައި ފައިސާ ނެތިގެން ނޫން ކަމަށާއި، ކަންކަން ހުއްޓިފައި ހުރީ ސަރުކާރުގެ ނާޤާބިލުކަމާއި ނޭއްގާނީ އަމަލުތަކުގެ ސަބަބުން ކަމަށެވެ.

މީގެ އިތުރުން، މީޑިއާ ކޮންޓްރޯލް ބިލުގެ މަޤްސަދަކީ ޓާގެޓުކޮށްގެން ވަކި މީޑިއާ ޗެނަލްތަކެއް ހުއްޓުވުންކަމަށްވެސް އަމީން ވިދާޅުވިއެވެ. އަދި ބިލު ފާސްވެއްޖެނަމަ ވަކިވަކި ޗެނަލްތަކުގެ ބާރު ކަނޑުވާލައި، އެ ޗެނަލްތަކާމެދު ފިޔަވަޅު އަޅާނެކަމަށްވެސް އަމީން ވިދާޅުވިއެވެ.