ހަނގުރާމައިން ސަލާމަތްވުމަށް އެގައުމުގައި ތިބި އެތައްހާސް ރަޝިޔާ ރައްޔިތުންނާ ޔޫކްރޭންގެ ރައްޔިތުން ކުރިއަށް އޮތް ދެ ހަފުތާގެ ތެރޭގައި ފުރަން ސްރީ ލަންކާގެ އިމިގްރޭޝަނުން އަންގައިފިއެވެ.

އިމިގްރޭޝަން ކޮންޓްރޯލަރު ޓޫރިޒަމް މިނިސްޓްރީއަށް ފޮނުވި ނޯޓިސްއެއްގައި ވަނީ އެކްސްޓެންޑް ޓޫރިސްޓް ވިސާގައި ތިބި ރަޝިޔާ އާއި ޔޫކްރޭންގެ ރައްޔިތުން 23 ފެބްރުއަރީން ފެށިގެން ދެ ހަފްތާގެ ތެރޭގައި ލަންކާއިން ފުރުމަށް އެދިފަ އެވެ.

ހަނގުރާމަ ފެށުނު ފަހުން ފާއިތުވި ދެ އަހަރު ތެރޭގައި 288،000 ރަޝިޔާ ރައްޔިތުންނާ، 20،000 ޔޫކްރޭން ރައްޔިތުން ލަންކާއަށް ދަތުރުކޮށްފައިވާ ކަމަށް ރަސްމީ ތަފާސް ހިސާބުތަކުން ދައްކަ އެވެ.

ނަމަވެސް ލަންކާގެ ރައީސް ރަނިލް ވިކްރަމަސިންހަގެ އޮފީހުން ވަނީ މި އެންގުމާ ގުޅިގެން އުފެދިފައިވާ ޑިޕްލޮމެޓިކް ޓެންޝަންތަކާ ހެދި އެ އެންގުން ތަހުގީގު ކުރަން ނިންމާފައެވެ.

ރައީސް އޮފީހުން ބުނީ އެ ނޯޓިސް ނެރެފައި ވަނީ ކެބިނެޓްގެ ރުހުން ނުލިބި ކަމަށާއި ވިސާ ކެންސަލްކުރުމަށް ސަރުކާރުން ރަސްމީކޮށް ނިންމާފައި ނުވާ ކަމަށެވެ.

އެތައް ހާސް ރަޝިޔާ ރައްޔިތުންނާ ޔޫކްރޭންގެ މަދު އަދަދެއްގެ ރައްޔިތުން ގިނަ ދުވަސްތަކެއް ވަންދެން އެގައުމުގައި މަޑުކޮށް، އަމިއްލަ ރެސްޓޯރެންޓްތަކާއި ނައިޓް ކްލަބްތައް ހުޅުވާ ވިޔަފާރި ކުރާތީ ލަންކާ ރައްޔިތުންގެ ގިނަ ޝަކުވާތަކާ ކަންބޮޑުވުން އެކުލެވިގެން ވެއެވެ.

ޓޫރިޒަމް މިނިސްޓަރު ހާރިން ފަރްނާންޑޯ ޑެއިލީ މިރާއަށް ވިދާޅުވީ ރަޝިޔާގެ ބައެއް ފަތުރުވެރިން ރަޖިސްޓްރީ ނުކޮށް ގަވާއިދާ ޚިލާފަށް އެގައުމުގެ ދެކުނު ސަރަހައްދުގައި ވިޔަފާރިތައް ހިންގާ ކަމުގެ ޝަކުވާ މިނިސްޓްރީއަށް ލިބެމުން އަންނަ ކަމަށެވެ. އިމިގްރޭޝަން ޑިޕާޓްމަންޓާ އެކު ކުރެވުނު މަޝްވަރާތަކަށް ފަހު ބައެއް ތަންތަނަށް ރެއިޑް ޖަހާފައިވާ ކަމަށް ވެސް އޭނާ ވިދާޅުވި އެވެ