ކޮރަޕްޝަން ހުއްޓުވުމަށްޓައި ގުޅިގެން މަސައްކަތް ކުރުމަަށް އިސްލާމިކް މިނިސްޓްރީއާއި އެންޓި ކޮރަޕްޝަން ކޮމިޝަން (އޭސީސީ) އިން އެއްބަސްވުމެއްގައި ސޮއިކޮށްފިއެވެ.

އިސްލާމިކް މިނިސްޓްރީގައި ބޭއްވި ރަސްމިއްޔާތެއްގައި އެ މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ މިނިސްޓަރު ޑރ.މުޙައްމަދު ޝަހީމް ޢަލީ ސަޢީދެވެ.

އޭސީސީގެ ފަރާތުން ސޮއިކުރެއްވީ އެ ކޮމިޝަނުގެ ރައީސް އާދަމް ޝާމިލެވެ.

އެއްބަސްވުމުގެ މަގުސަދުތަކުގެ ތެރޭގައި ކޮރަޕްޝަން ހުއްޓުވަން ދެ ފަރާތުން ގުޅިގެން ކުރެވިދާނެ ކަންކަން ދެނެގަނެ އެ މަގުސަދު ހާސިލުކުރެވޭނެ ގޮތެއްގެ މަތިން ކުރާނެ މަސައްކަތްތައް ކަނޑައެޅުން ހިމެނެއެވެ.

އެގޮތުން ކޮރަޕްޝަން ހުއްޓުވަން އަޅަންޖެހޭ ފިޔަވަޅުތަކުގެ މައްޗަށް ކޮމިޝަނުން ދޭ ލަފަޔާއި އިރުޝާދު ތަންފީޒު ކުރުމުގައި ދެ ފަރާތުން ގުޅިގެން ކުރާނެ ކަންކަން ކަނޑައެޅުން ހިމެނޭކަމަށެވެ.

މީގެއިތުރުން ދެ ފަރާތުގެ ދެމެދުގައި ފަންނީ އެހީތެރިކަން ބަދަލުކުރުމުގައާއި މައްސަލަތަކާ ގުޅިގެން ދިމާވާ ކަންކަމުގައި ފީޑްބެކް ޕްރޮސެސްއެއް ގާއިމުކޮށް އަމަލުކުރާނެ ގޮތެއް ކަނޑައެޅުން ހިމެނޭކަމަށް އެ ވުޒާރާއިން ވަނީ ބުނެފައެވެ.