ހއ. ބާރަށުގައި ކަޅުއޮށްފުންމި އަލަށް ބަންނަވައިގެން އޭގެ ރިޔާ ފެއްސެވުމަށް ބޮޑުތަކުރުފާނު ޖެއްސެވި ކަޑައިންހެދި ބޮޑުވި ކަމަށް ބުނާ، 400 އަށް ވުރެ ގިނަ އަހަރުވީ ކާނި ގަހުގައި ބަޔަކު ރޯކޮށްލައިފި އެވެ.
އެ ގަހުގައި ރޯކޮށްލާފައިވާ މަންޒަރުގެ ފޮޓޯ ސޯޝަލް މީޑިއާގައި މިހާރު އާންމުވެފައިވާއިރު، ގަސް އެއްކޮށް އަނދާފައިވާ ތަން ފޮޓޯތަކުން ދައްކައެވެ.
ކާނިގަހުގައި ރޯކޮށްލި ސަބަބު އަދި ހާމަނުވާކަމަށް ގިނަ ފަރާތްތަކުން ބުނެއެވެ. ނަމަވެސް އެ ރަށުގެ ގިނަ ބަޔަކު ބުނަމުން އަންނަނީ އެ ގަހުގައި ބަޔަކު ރޯކޮށްލާފައި ވަނީ ސިޔާސީ ބޭނުމެއްގައިކަމަށެވެ.
އެކަމާ ގުޅިގެން ބާރަށު ކައުންސިލްގެ ބަހެއް އަދި ލިބިފައިނުވާކަންވެސް ފާހަގަކޮށްލެވެއެވެ.
ތާރީހީ ކާނި ގަހުގައި ރޯކޮށްލިި މައްސަލަ އާންމުން އަދި ސަރުކާރުގެ އިސް ފަރާތްތަކުން އަންނަނީ ކުށްވެރި ކުރަމުންނެވެ.
އެގޮތުން، އެ ކަންތައް ޖިނާއީ މައްސަލައެއްގެ ގޮތުގައި ތަހުގީގު ކުރުމަށް މިނިސްޓްރީ އޮފް ސިޓީސްގެ މިނިސްޓަރު އާދަމް ޝަރީފް އުމަރު ވަނީ އެކްސްގައި ޕޯސްޓެއް ކުރައްވާ ގޮވާލާފައެވެ.
