މެދުއިރުމަތީގެ ހަނގުރާމައާ ގުޅިގެން އަރަބި އިސްލާމީ ގައުމުތަކަށް ރައީސް ޑރ މުހައްމަދު މުއިއްޒު ގުޅުއްވާ ލިސްޓުގައި އިރާނު ނެތްކަން ހާމަވެއްޖެއެވެ.
ރައީސް އޮފީހުގައި ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ސްޓޭޓުމަންޓު ދެއްވަމުން ރައީސް މުއިއްޒު ވަނީ ހަނގުރާމައާ ގުޅިގެން ޔޫއޭއީ، ސައުދީ އަރަބިއާ އޮމާން އަދި ގަތަރު އަދި ބަހްރެއިންގެ ވެރިންނަށް ގުޅާނެ ކަމަށް ވިދާޅުވެފައެވެ. އެމަނިކުފާނު ވިދާޅުވި މި ގައުމުތަކަށް ގުޅުއްވަނީ ހަނގުރާމައިގައި އެ ގައުމުތަކަށް އިރާނުން ހަމަލާދީ ގެއްލުންތަކެއް ދީ މީހުން މަރަމުންދާތީ ކަމަށެވެ.
ނަމަވެސް އިރާނަށް އިސްވެ ހަމަލާދިނީ އެ އަރަބި ގައުމުތަކުން ވާގިވެރިވާ އަދި އެގައުމުތަކުގައި އެއާބޭސްތައް ހުރި އެމެރިކާއާ އިޒްރޭލު ގުޅިގެން ކަމަށްވީ ނަމަވެސް ރައީސް މުއިއްޒަށް އެކަން ބޮޑުކަމަކަށް ވެވަޑައިނުގެންެވިކަން ވާހަކަފުޅުތަކުން ހާމަވެފައިވެއެވެ.
ހަނގުރާމައިގައި ލިބޭ ގެއްލުންތަކާ ގުޅިގެން ތައުޒިޔާ ކިޔާ ދިވެހި ސަރުކާރާ ރައްޔިތުން އެ ގައުމުތަކާ އެކު ދެމިއޮތްކަން ހާމަކުރަން ގުޅުއްވާނެ ލިސްޓު ރައީސް މުއިއްޒު ހާމަކުރެއްވިއިރު ހަނގުރާމައިގައި ޝިކާރައަކަށް އެންމެ ފުރަތަމަވި އިރާނުގެ ނަމެއް ނެތެވެ.
އިރާނުން އަރަބި ގައުމުތަކަށް ހަމަލާ ދެނީ ކުރިން އިންޒާރު ދިނުމަށް ފަހުއެވެ. އިރާނުން ވަނީ އަރަބި އިސްލާމީ ގައުމުތަކުގައި ހުރި އެމެރިކާގެ އެއާބޭސްތައް އިރާނަށް ހަމަލާދޭން ބޭނުންކުރުމުގެ ފުރުސަތު ދޭނަމަ އެ ގައުމުތަކަށް ހަމަލާ ދޭނެ ކަމަށް ކުރިން އިންޒާރުދީފައެވެ.
