އިންޑިއާގެ ޓަމިލް ނާޑޫ ސްޓޭޓްގައި ރޭ ބޭއްވި ބޮޑު ސިޔާސީ ރެލީއެއްގެ ތެރޭގައި ފިތިގެން ގިނަ އަދަދެއްގެ ބަޔަކު މަރުވެއްޖެ އެވެ.
ސިޔާސީ ދާއިރާ އަށް މިހާރު ނުކުމެފައިވާ އިންޑިއާގެ ދެކުނުގެ މަޝްހޫރު އެކްޓަރު ވިޖޭގެ ސަޕޯޓަރުންތަކެއް ކަރޫރް ޑިސްޓްރިކްޓުގައި ބޭއްވި އެއްވުމުގައި މީހުން ގިނަވެ ފިތުމުގެ ސަބަބުން ހާސްކަން ބޮޑުވެ ސަލާމަތްވާން މީހުން މަސައްކަތް ފެށީ އެއްވުމުގައި ވިޖޭ ވާހަކަ ދައްކަނިކޮށެވެ. ހާލަތު ގޯސްވެ އެންމެ ފަހުން ވިޖޭއަށް ޖެހުނީ ވާހަކަ ދެއްކުން ހުއްޓާލާށެވެ.
ހިންދުސްތާން ޓައިމްސް އިން ބުނެފައިވާ ގޮތުގައި މި ހާދިސާ ހިނގީ ވިޖޭ ދެކެލަން ބޭނުންވާ މީހުން ބެރިކޭޑް ހުރަސްކޮށް ސްޓޭޖާ ކައިރިއަށް ދާން އުޅުމުގެ ސަބަބުންނެވެ.
ބޮޑުވަޒީރު ނަރެންދުރަ މޯދީ ވަނީ މިއީ ހިތާމަވެރި ހާދިސާއެއް ކަމަށް ވިދާޅުވެ އާއިލާތަކަށް ތައުޒިޔާ ވިދާޅުވެފަ އެވެ.
މަރުވި މީހުންގެ އާއިލާތަަށް ބަދަލުގެ ގޮތުގައި އެއް މިލިއަން ރުޕީސް (11،300 ޑޮލަރު) ދޭން ސަރުކާރުން ނިންމާފައިވާ އިރު، ރެލީގެ ތެރޭގައި ބަޔަކު މަރުވި މައްސަލަ އިތުރަށް ތަހުގީގު ކުރާނެ ކަމަށް ޗީފް މިނިސްޓަރު ވިދާޅުވި އެވެ.
