އިންޑިއާ ސިފައިންގެ ވެރިޔާ ޖެނެރަލް އުޕެންދްރާ ދުވީދީ ޕާކިސްތާނަށް ވަރުގަދަ އިންޒާރެއް ދީފިއެވެ.
އޭނާ ވިދާޅުވީ ޕާކިސްތާނުން އާ ޢަދާވާތްތެރިކަމެއް ފަށައިފިނަމަ ދުނިޔޭގެ މެޕްއިން ޕާކިސްތާން ފޮހެލެވޭ ވަރަށް އިންޑިއާ އޮތީ ވަރުގަދަ ރައްދު ދިނުމަށް ފުރިހަމައަށް ތައްޔާރަށް ކަމަށެވެ.
ސިފައިންނާ ވާހަކަ ދައްކަވަމުން ޖެނެރަލް ދުވެދީ ވިދާޅުވީ މީގެ ކުރިން “އޮޕަރޭޝަން ސިންދޫ 1.0” ގައި އިންޑިއާއިން ދެއްކި ހިފެހެއްޓުމެއް ނުދައްކާނެ ކަމަށެވެ. އޭނާ ބުނި ގޮތުގައި ޕާކިސްތާނުން ބޯޑަރު ހުރަސްކޮށް ޓެރަރިޒަމަށް ތާއީދު ކުރަމުން ގެންދާނަމަ ކުރިއަށް އޮތްތަނުގައި ދޭންޖެހޭ ޖަވާބުތައް ވަރުގަދަ ވާނެ ކަމަށެއެވެ.
ސިފައިންގެ ވެރިޔާ އޮޕަރޭޝަން ސިންދޫރުގެ މުހިންމު ނަތީޖާތަކަށް އަލިއަޅުވާލައްވައި ވިދާޅުވީ އިންޑިއާގެ މައިގަނޑު ކާމިޔާބަކަށް ވާނީ ޕާކިސްތާނުގެ ތަނެއް ހަލާކުކޮށްލުމެވެ. އަދި އެ އޮޕަރޭޝަނަށް ބޮޑުވަޒީރު ނަރެންދުރަ މޯދީ އަމިއްލައަށް ނަން ދެއްވިކަން ވެސް އޭނާ ފާހަގަކުރެއްވި އެވެ.
މި ބައްދަލުވުމުގައި އޭނާ ވަނީ ތިން އޮފިސަރުންނަށް އެ އޮޕަރޭޝަންގައި އަދާކުރި ދައުރަށް ޝަރަފުވެރިކަން ދެއްވާފަ އެވެ.
ޕާކިސްތާނުން ވަނީ މިފަހުން ސައުދީ އަރައްބިއްޔާއާއި އެކު ނިއުކްލިއަރ އެއްބަސްވުމެއްގައި ސޮއިކޮށް ސަލާމަތީގޮތުން ވަރުގަދަ ފިޔަވަޅުތައް އަޅުއްވާފައެވެ. އިންޑިއާއިން އަންނަނީ މިކަމާއި މެދު ކަންބޮޑުވެ ޕާކިސްތާނާއި ދެކޮޅަށް ރޭވުންތައް ރާވާ ދަތިކުރުމަށް ގިނަ ކަންކަން މަޝްވަރާކުރަމުންނެވެ.
