ރައީސް އަޒުލްކުރުމަށް މެމްބަރުން އަދަދު ގުނަންޖެހޭނީ ހުސްގޮނޑި ހިމަނައިގެން ކަމުގައި ސުޕްރިމް ކޯޓުން ހުކުމްކޮށްފިއެވެ.

ރައީސްއާއި ނާއިބު ރައީސް އަޒުލްކުރެވޭގޮތަށް ލުއިކަން ގެނެސް، މަޖިލިހުގެ ގަވާއިދަށް ގެނެސްފައިވާ އިސްލާހުގެ މައްސަލަ ބަންޑާރަނައިބުގެ އޮފީހުން ސުޕްރިމް ކޯޓަށް ހުށަހެޅި މައްސަލާގައި މިއަދު ކުރި ހުކުމްގައި ސުޕްރިމް ކޯޓުން ވިދާޅުވީ ރައްޔިތުންގެ މަޖިލީހުގެ ޖުމުލަ މެންބަރުންގެ އަދަދު 80 އަށް ހަދަން މަޖިލީހުގެ ގަވާއިދުގެ 49 ވަނަ މާއްދާއަށް ގެނައި ބަދަލު ގާނޫނުއަސާސީއާ ހިލާފު ކަމަށާއި އެހެންނަމަވެސް އެ މާއްދާ މިހާރު ބާތިލުކޮށްފައިވާތީ ކުރެވޭނެ ކަމެއް ނެތް ކަމަށެވެ.

ބަންޑާރަނައިބުގެ ފަރާތުން ސުޕްރީމް ކޯޓަށް ހުށަހަޅާފައިވަނީ މަޖިލީހުގެ ހިންގާ ގަވާއިދުގެ 49 ވަނަ މާއްދާއަށް ގެނައި އިސްލާހަކީ ގާނޫނުއަސާސީއާ ހިލާފު އިސްލާހެއް ގޮތުގައި ކަނޑައަޅައިދިނުމަށެވެ.

އެ މައްސަލައިގައި ހުކުމް މިއަދު ހެނދުނު ސުޕްރީމް ކޯޓުގައި ކޮށްފައިވަނީ އަޑުއެހުމުގައި އެ މައްސަލަ ބެއްލެވި ފަސް ފަނޑިޔާރުންގެ އިއްތިފާގުންނެވެ. އަދި މައްސަލަ ބެއްލެވި ފަނޑިޔާރުންގެ އިއްތިފާގުން ވަނީ ގަވާއިދަށް ގެނައި އިސްލާހަކީ ބާތިލު އިސްލާހެއް ކަމަށް ކަނޑައަޅުއްވާފައެވެ.

އެހެންނަމަވެސް އެ މައްސަލާގައި މިހާރު ކުރެވޭނެކަމަށް ނެތްކަމަށް ނިންމާފައިވަނީ، މައްސަލަ ސުޕްރިމް ކޯޓުގައި ކުރިޔަށް ދަނިކޮށް، އެ މާއްދާ އުވާލާފައިވާތީކަމަށްވެސް ސުޕްރިމް ކޯޓުގެ ހުކުމުގައި ވިދާޅުވެފައިވެއެވެ.

ނަމަވެސް، ކޯޓުން މިއަދު އިއްވި ހުކުމުގައި ބުނެފައި ވަނީ އެ އިސްލާހު ގެނެސްފައި ވަނީ ރަގަޅު ނިޔަތެއްގައި ނޫން ކަމަށެވެ.

ސުޕްރީމް ކޯޓުގައި މައްސަލަ ބެއްލެވި ހުރިހާ ފަނޑިޔާރުންގެ އިއްތިފާގުން އިއްވި ހުކުމުގައި ބުނީ، މަޖިލީހުން އިސްތިއުފާ ދެއްވި ހަތް މެމްބަރުން ނުގުނުމަކީ ގާނޫނުއަސާސީގެ 71 ވަނަ މާއްދާގެ ދަށުން، މަޖިލީސް މެމްބަރުންގެ އަދަދު ކަނޑައަޅާ އުސޫލާ ހިލާފު ނިންމުމެއް ކަމަށެވެ. އެ މާއްދާގައި ބަޔާންކޮށްފައި ވަނީ މަޖިލީހުގެ ގާނޫނީ އަދަދަކީ ޖުމްލަ މެމްބަރުންގެ 25 ޕަސެންޓްގެ ގޮތުގަ އެވެ.

މަޖިލީހުގެ ގަވާއިދަށް ބަދަލު ގެނެވޭނީ ގާނޫނުއަސާސީއާ ހިލާފު ނުވާ ގޮތެއްގެ މަތިން ކަމަށްވާއިރު، އެ އިސްލާހު ގެނެސްފައި ވަނީ ގަވާއިދު ހެދުމަށް މަޖިލީހަށް ލިބިދީފައި އޮތް ހުދޫދުގެ ބޭރުން ކަމަށް ހުކުމުގައި ބަޔާންކޮށްފައިވެ އެވެ.

ރައީސުލްޖުމްހޫރިއްޔާ މަޤާމުން ވަކިކުރުމަށް ރައްޔިތުންގެ މަޖިލީހުގެ ގަވާއިދުގައި އަޒުލު ކުރުމުގެ ޕްރޮސެސް ބަޔާން ކުރާ މާއްދާތައް ބަދަލު ކުރި މައްސަލަ ސްޕްރީމް ކޯޓުން ބަލައިގެންފައިވަނީ މިމަހުގެ 5 ވަނަ ދުވަހުއެވެ.

އެ މައްސަލަ ސްޕްރީމް ކޯޓަށް ހުށަހެޅީ މިމަހުގެ 4 ވަނަ ދުވަހު ބަންޑާރަ ނައިބު އޮފީހުންނެވެ.