އަދުގެ ސަރުކާރުގެ ވެރިންނަށް ކުރިން ދުއްޕާނަކަށް ވި ހަނިމާދޫ އިންޓަނޭޝަނަލް އެއާޕޯޓު މިހާރު އޯކޭވެ, ރަސްމީކޮށް ހުޅުވައިފިއެވެ.

އެމްޑީޕީގެ ސަރުކާރުން އިންޑިއާގެ އެކްޒިމް ބޭންކުގެ އެހީގައި ތަރައްގީ ކުރަން ފެށި ހަނިމާދޫ އެއާޕޯޓަކީ އިންޑިއާގެ އަސްކަރީ އެއާޕޯޓުކަމަށް އަދުގެ ސަރުކާރުގެ ވެރިން އިދިކޮޅުގައި އޮވެފައި ހަރުއަޑުން ގޮވި ނަމަވެސް މިއަދު އެއާޕޯޓު އިންޑިއާގެ އެހީގައި ހަދާ ނުނިމެނީހެން ވަނީ ހުޅުވާ އިންޑިއާއަށް ސަނާ ކިޔާފައެެވެ.

އިންޑިއާއަށް އެވަރަށް އެއްޗެހި ކިޔުމަށްފަހު އާދިއްތަ ދުވަހު އެއާޕޯޓު ހުޅުވުމަށް އިންޑިއާއިން ވަޑައިގެންނެވީ މޯދީގެ ހާއްސަ މަންދޫބެކެވެ.

އެގޮތުން ހަނިމާދޫ އިންޓަނޭޝަނަލް އެއާޕޯޓު ހުޅުވައިދެއްވީ ރައީސް މުހައްމަދު މުއިއްޒާއި އިންޑިއާގެ ބޮޑުވަޒީރު ނަރެންދުރަ މޯދީގެ ހާއްސަ މަންދޫބު، ސިވިލް އޭވިއޭޝަން ޔޫނިއަން މިނިސްޓަރު ކިންޖަރަޕޫ ރާމް މޯހަން ނައިދު އެވެ.

މި އެއާޕޯޓު އެމްޑީޕީ ސަރުކާރުން އަޅަން ފެށުމުން އެވަރަށް ފާޑުކިޔުން އަމާޒުކުރި ނަމަވެސް މިއަދު ހަނިމާދޫ އެއާޕޯޓުގެ މަސައްކަތުގެ 72 އިންސައްތަ ނިންމެވީ ރައީސް މުއިއްޒުކަމަށް ވިދާޅުވެ ޕީއެންސީ ސަރުކާރުން އަންނަނީ ފާޑުކިޔަމުންނެވެ.

އިންޑިއާގެ އެގްޒިމް ބޭންކުގެ 2.1 ބިލިއަން ރުފިޔާގެ ލޯނެއްގެ ދަށުން ކުރިއަށް ގެންދާ އެ މަޝްރޫއުގެ އަމަލީ މަސައްކަތް ފެށީ ޖެނުއަރީ 18، 2023 ގަ އެވެ. އެ މަސައްކަތް ކުރަނީ އިންޑިއާގެ ބޮޑު އިންފްރާސްޓްރަކްޗާ ކުންފުންޏެއް ކަމަށްވާ ޖޭއެމްސީ އެކްސްޕޯޓްސް އިންނެވެ.