ވިލިމާލޭގެ މަގުތައް ޒަމާނީ ފެންވަރަށް ހަދަން ނިންމުމާ ގުޅިގެން ޖަމިއްޔާތަކުން ކަންބޮޑުވުން ފާޅުކޮށް ބަޔާނެއް ނެރެފިއެވެ.

ވިލިމާލޭގައި ދިރިއުޅެ އަންމުންގެ ޖަމިއްޔާ ކަމުގައިވާ ވިލިޖޯލި އާއި ސޭވް ދަ ބީޗް ގުޅިގެން ނެރުނު ބަޔާނެއްގައި ވަނީ ވިލިމާލޭގެ މަގުތައް މިހާރުވެސް ހުރީ ރަގަނޅު ފެންވަރެއްގައި ކަމަށެވެ.

މަގުތައް ހެދުމުގެ ބަދަލުގައި ވަކިވަކި މަރާމާތުތައް ކުރުން މާ ރަގަނޅުކަމަށް ވެސް މި ބަޔާނުގައި ފާހަގަކޮށްފައިވެއެވެ.

މީގެ އިތުރުން މި ބަޔާނުގައި ވަނީ މަގުތައް މަރާމާތު ނުކޮށް ގިނަ ދުވަސްވެފައިވާކަން ފާހަގަކޮށްފައެވެ. ޕޭވްމަންޓް މަރާމާތުކުރުމާއި މަގުތައް އެއްވަރުކުރުމުގެ އިތުރުން ހަލާކުވެފައިވާ ކާނުތަކާއި މަގުގެ ބައިތައް މަރާމާތުކުރުން ކަހަލަ ކަންކަން ކުރަން ޖެހިފައިވާ ކަމަށެވެ.

އެހެންނަމަވެސް ޕޭވްމަންޓަށް ގަސްގަހުގެ މޫގަނޑު އަރައިގެން އުފުލިފައި ހުރި ތަންތަން ރަނގަޅުކުރުމުގެ ގޮތުން ގަސްތައް ކެނޑުމުގެ ބަދަލުގައި ތަރައްގީވެފައިވާ އެހެން ގައުމުތަކުގައި ވެސް އަމަލުކުރާ ތަފާތު ގޮތްގޮތް ބޭނުންކޮށްގެން ގަސްތައް ހިމާޔަތްކުރުމަށް އެދޭ ކަމަށް އެ ބަޔާނުގައިވެއެވެ.

ބަޔާނުގައި ބުނެފައިވާ ގޮތުގައި ވިލިމާލެ އަކީ އަބަދުވެސް ތިމާވެއްޓާ ރައްޓެހި އެއްގަމު އުޅަނދު ދުއްވުމަށް ވަކި މިންވަރެއްގައި ކޮންޓްރޯލްކޮށްފައި އޮންނަ މާލޭގެ އަވަށެކެވެ.

އަދި މިއީ މާލެ ސަރަހައްދުގައި ގުދުރަތީ މާހައުލު މުއްސަނދިކޮށް އޮތް ހަމައެކަނި ރަށް ކަންވެސް ފާހަގަ ކޮށްފައިވެއެވެ. އެހެންކަމުން ޒަމާނީ ފެންވަރަށް މަގު ހަދަން ނިންމައި އެރަށުގެ ގުދުރަތީ ރީތިކަން ނައްތާލަން މަސައްކަތް ނުކުރުމަށް މި ބަޔާނުގައި ވަނީ ގޮވާލައިފައެވެ.

ވިލިމާލޭގެ މަގުތަކުގެ ސާވޭ ކުރުމާއި އެހެނިހެން މަސައްކަތް ކުރުމަށް 1.79 މިލިޔަން ރުފިޔާ އަށް އިމާރާތްކުރުމަށް ބިނާރާ ބެހޭމިނިސްޓްރީން ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ ވަނީ ހަވާލުކޮށްފައެވެ. އަދި މިމަސައްކަތް އާރުޑީސީއާ ހަވާލުކުރެވުނީ ހަތަރު މަސް ދުވަސްތެރޭ ނިންމާ ގޮތަށެވެ.