ދިވެހިރާއްޖޭގެ ނޫސްވެރިންނާއި، މީޑިއާތަކާއި އަދި ދިވެހި ރައްޔިތުންނާއި ދެކޮޅަށް މި ސަރުކާރުން ފާސްކޮށް ރައީސް މުއިއްޒު ތަސްދީޤުކުރެއްވި މިނިވަން މީޑިއާތައް ކޮންޓްރޯލް ބިލާއި ގުޅިގެން އުފެއްދި މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނަށް ކުރިމަތިލެއްވި ބޭފުޅުންގެ ތެރެއިން ތިން ބޭފުޅަކަށް ރުހުން ދިނުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ފާސްކޮށްފިއެވެ.

މިގޮތުން ރުހުން ދީފައިވަނީ ބްރޯޑްކާސްޓިން ކޮމިޝަންގެ ކުރީގެ ރައީސް ޞަފާ ޝަފީގާއި މެންބަރު އައިމިނަތު ސަރާހަތު އިއްޒަތާއި މުހައްމަދު ފަރުޝަތަށެވެ.

ކޮމިޝަނަށް ކުރިމަތިލެއްވި 10 ބޭފުޅުންގެ ތެރެއިން ދެ ބޭފުޅަކު އިންޓަވިއު މަރުހަލާގެ ކުރިން ނަން އަނބުރާ ގެންދެވިއެވެ. އަދި ބާކީ ތިބި އަށް ބޭފުޅުންނާ އިންޓަވިއު ކުރުމަށްފަހު ކޮމިޓީން ވަނީ މާކްސް ދީފައެވެ. މަޖިލީހުގެ ގަވާއިދުގައިވާ ގޮތުން، ކޮމިޓީން ވޯޓަށް އެހުމަށް މަޖިލީހުގެ ތަޅުމަށް ފޮނުވޭނީ 75 އިންސައްތައަށްވުރެ މަތިން މާކްސް ލިބޭ ބޭފުޅުންގެ ނަންތަކެވެ.

މިނިވަން މުއައްސަސާތަކުގެ ކޮމިޓީން ކެންޑިޑޭޓުންގެ ތަޢުލީމާއި ތަޖުރިބާ އަދި އިންޓަވިއުއަށް ބަލައި މާކްސް ދިނުމަށްފަހު، 75 އިންސައްތައަށްވުރެ މަތިން މާކްސް ލިބިފައިވަނީ މި ތިން ބޭފުޅުންނަށެވެ. މި މައްސަލައިގައި މިއަދުގެ މަޖިލީހުގެ ޖަލްސާގައި ވޯޓަށް އެހުމަށް ވަނީ ތާވަލުކޮށްފައެވެ.

ހަތް މެންބަރުންގެ މައްޗަށް އެކުލެވޭ މީޑިއާ އެންޑް ބްރޯޑްކާސްޓިން ކޮމިޝަނަށް މަޖިލީހުން އައްޔަންކުރާނީ ތިން މެންބަރުންނެވެ. މިހާރު ވަނީ އިންތިޚާބަކާ ނުލައި ބްރޯޑްކާސްޓަރުންނާއި އެހެނިހެން މީޑިއާތަކުން ހަތަރު މެންބަރުން އިންތިޚާބުވެފައެވެ. މަޖިލީހުން އައްޔަންކުރާ މެންބަރުންނާއެކު މީޑިއާ އެންޑް ބްރޯޑްކާސްޓިން ރެގިއުލޭޝަން ޤާނޫނުގެ ދަށުން އުފެދޭ ފުރަތަމަ މީޑިއާ އެންޑް ބްރޯޑްކާސްޓިން ކޮމިޝަނަށް މެންބަރުން ހަމަވާނެއެވެ.

މި ސަރުކާރުން ފާސްކުރި މި ބިލާއި ގުޅިގެން ދުނިޔޭގެ ބޮޑެތި ގައުމުތަކުންނާއި އެކި ޖަމިއްޔާތަކުންވެސް ވަނީ މިފަދައިން މިނިވަން ނޫސްވެރިކަމަށް ހުރަސްނޭޅުމަށް ރައީސް މުއިއްޒަށް ގޮވާލާފައެވެ. މި ބިލުގެ ސަބަބުން ގިނަ މީޑިއާތަކާއި އާންމުން މީގެ ޝިކާރައަށް މިހާރު އަންނަނީ ވަމުންނެވެ.