ހުޅުމާލެ ދެވަނަ ފިޔަވަހީގެ ހިޔާ ޓަވަރުތަކުން ފެނުގެ ހިދުމަތް ކަނޑާލިތާ 4 ގަޑިއިރަށްވުރެ ގިނަ އިރުވެއްޖެއެވެ.
ފެނުގެ ހިދުމަތް ކަނޑާލާނެކަމަށް ބުނެ އެމްޑަބްލިއުއެސްސީ އިން އެކްސްގައި ކުރި ޕޯސްޓެއްގައި ބުނީ ހިޔާ ފްލެޓްތަކުގެ މީޓާރ ރޫމްގައި މެއިންޓެނެންސް މަސައްކަތެއް ކުރުމަށްޓަކައި 20 އޮކްޓޫބަރު ވާ ހޯމަ ދުވަހުގެ ރޭ މެންދަމު 00:00 އިން ފެށިގެން 02:00 އާ ހަަމައަށް ހިޔާ އެކަކުން ފެށިގެން 16 ގެ ހުރިހާ ފަންގިފިލާއިން ފެނުގެ ހިދުމަތް ކަނޑާލާނެކަމަށެވެ.
ހިޔާ ޓަވަރުތަކުން ފެން ކަނޑާލުމަށްފަހު ދޭއް ޖަހާއިރަށް ފެން ލިބޭނެކަމަށް އެމްޑަބްލިއުއެސްސީ އިން ބުނި ނަމަވެސް މިހާރު ވަނީ ހަތަރު ގަޑިއިރަށްވުރެ ގިނަ އިރުވެފައެވެ.
ހިޔާގައި ދިރިއުޅޭ ރައްޔިތުން ކަންބޮޑުވުމެއްގެ ތެރޭގައި ތިބި އިރު އެމްްޑަބްލިޔުއެސްސީ އިން ފޯނަށް ޖަވާބުވެސް ދީފައިނުވެއެވެ.
ކުރިން ފެން ކަނޑާލުމުގެ ކުރިން ފްލެޓްގެ ވެރިންގެ ފޯނަށް އެސްއެމްއެސް އަކުން ފެން ކަނޑާނެ ވާހަކަ އަންގައެވެ. ނަމަވެސް މިފަހަރު އެފަދައިން އަންގާފައިވެސް ނުވާތީ ފެން ކެނޑޭނެކަމެއް ގިނަ ބަޔަކަށް އެނގިފައި ނެތެވެ.
