ކޮންމެ ކަމެއް ނުވަތަ އެއްޗެއް ނަމަވެސް ގަނޑުބަނޑުކޮށް އޭގެ އަސްލު އޮޅުވާލަން މަސައްކަތްކުރެވިދާނެއެވެ. ނަމަވެސް އެ އުފެދުމުގެ އަސްލު އެއްވެސް މީހަކަށް އޮޅުވާނުލެވޭނެއެވެ. އެއީ ތިމާ އެކަމަށް ކިތަންމެ ބޭނުންވި ނަމަވެސްވެއެވެ.

އެގޮތުން މި ރިޕޯޓުގައި އަލިއަޅުވާމިލަނީ މި ސަރުކާރު ތެރެއިން ބޮޑެތި ވައްކަންތައް ކޮށް ކޮރަޕްޝަންގެ ހުތުރު އަމަލުތައް ހިންގުމަށް ފަހު އެކަމުގައި މަތިއަޅަން ނުވަތަ އެކަންކަން ފަސް އަޅާ ފޮރުވަން ކުރަމުންދާ ނާޒަހުޒީބު ކަޓު ކަންކަމަށެވެ.

ފުރަތަމަ ކަމަކަށް ސަރުކާރުގެ ތެރެއިން ހިންގާ ކޮރަޕްޝަންގެ އަމަލުތައް ހުއްޓުވަން "ވިސްލް ބްލޯ"ގެ ނަމުގައި ރިޕޯޓުކުރެވެން އިނދެއެވެ. ނަމަވެސް މިއަދު އެ ބުނާ ބްލޯއެއް ބްލޯ ކުރާ ހިސާބުން އެކަން ކުރާ މީހަކު ދަނީ ތްރޯވެގެންނެވެ.

މާ ދުރަކުން ނޫނެވެ. އެންސްޕާގެ ތެރެއިން ހިންގި ބިޔަ، ބޮޑު، ފަލަ، ރޫފަ ހެޔޮ ވައްކަން، އާދެ މިހާރު އެންމެ އާންމު ނަމުން ނަމަ "ހީނާ ސްޕާގެ"ގެ ވައްކަން ހިނގި މަގަށް ބަލާލަމާތޯއެވެ.

އެޖެންސީ ހިންގަން އިމާރާތެއް ކުއްޔަށް ހިފުމުގެ ނަމުގައި ރައީސުލްޖުމްހޫރިއްޔާ ޕްރޮމޯޓުކުރުމަށް އުފެއްދި އެމްއެމްޓީވީ ނަމަކަށް ކިޔާ ޓީވީ ސްޓޭޝަން އާ ދެމެދު ހިނގި މުއާމަލާތްތައް ތިޔައިގެ ތެރެއިން އެއްވެސް ބޭފުޅަކު ހަނދާން ނެތޭނެހެން ހީނުވެއެވެ.

އެންސްޕާ އާއި އެމްއެމް ޓީވީ ހިންގާ ކުންފުނި މޯލްޑިވްސް މީޑިއާ ހައުސްއާ ދެމެދު 34.8 މިލިއަން ރުފިޔާގެ އެއްބަސްވުމެއް ހަދާފައިވެއެވެ. ބަލާ ހޯދާލުމުން ހާމަވެގެން ދިޔައީ އެއީ އެންސްޕާ ހިންގުމަށް ފަސް އަހަރު ދުވަހު މއ. ސީރާޒީގެ ދެ ފަންގިފިލާ ކުއްޔަށް ހިފުމާ ގުޅޭ އެއްބަސްވުމެއްކަމެވެ.

ތަފްސީލަށް ބަލާލާއިރު، އެ ގެއިން ދެ ފަންގިފިލާ ހިފާފައިވަނީ މަހަކު 580،000ރ އެންސްޕާއިން ކުއްޔަށް ހިފާފައިވެއެވެ. އަދި މިނިސްޓްރީ އޮފް ފިނޭންސްއިން ހިންގާ ޓެންޑާ ބޯޑް މެދުވެރިކޮށް ހަދާފައިވާ މި އެއްބަސްވުމުގެ ދަށުން، މީޑިއާ ހައުސްއިން ހަމަ އެ އިމާރާތުން 4 ފަންގިފިލާ ކުއްޔަށް ހިފާފައިވާކަން ހާމަވެފައިވެއެވެ.

އޭގެ ތެރެއިން 2 ފަންގިފިލާ އެންސްޕާ އަށް ދޫކޮށްފައިވާއިރު، އަނެއް 2 ފަންގިފިލާ ބޭނުންކުރަނީ ރައީސް މުއިއްޒުގެ ޓީވީ ސްޓޭޝަންގެ ކަމަށް ރަށު ތެރޭގައި ކިޔާ އުޅޭ ޓީވީ ސްޓޭޝަންގެ މަސައްކަތްތަކަށެވެ.

އެނގިފައިވާ ގޮތުގައި އެ ހަތަރު ފަންފިފިލާއަށް ޖުމްލަ ދައްކަން ޖެހެނީ 580،000ރ އެވެ. އެހެންކަމުން އެންސްޕާ މެދުވެރިކޮށް މިއޮތީ އެމްއެމް ޓީވީ ހިންގާ ދެ ފަންގިފިލާގެ ކުލި ވެސް ހަމަޖައްސާފައެވެ.

އެހެންކަމުން މިއީ ބޮޑު އަގުގައި ރައީސް މުއިއްޒުގެ ޓީވީ ހިންގާ ކުންފުންޏަށް މަންފާވާ ގޮތަށް، ރައްޔިތުންގެ އިޖްތިމާއީ ފައިސާ އިސްރާފުކޮށް، ކޮށްފައިވާ ވައްކަމެއްގެ ގޮތުގައި ގިނަ ބަޔަކު ސިފަކުރާ ކަމެކެވެ. ނަމަވެސް މިވާހަކަތައް އާންމުންނާ ހަމައަށް ތިލަވެ މުޅި ގައުމު އެލާޓުވުމުން ދެން ހެދި ވާޑަމަކީ ކޮބައިތޯއެވެ. ތި އެންމެ ބޭފުޅުން ހަނދާން ހުންނާނެކަން ޔަގީނެވެ. ހެއްދެވީ ކިހިނެއްތޯއެވެ؟ އާދޭހެއެވެ. އެއްބަސްވުން ބާތިލުކުރީއެވެ. ނަމަވެސް އެއްބަސްވުން ބާތިލުކުރި އިރު މިއަތީ ކުރާނެ ވަރަކަށް ދައުލަތުގެ ބައިތުލްމާލުން މުށް ޖަހާފައި ވައްކަންކޮށް ނިންމާފައެވެ. ތިމާމެން ބޭނުންވިކަންކަން ހާސިލްކޮށް ނިންމާފައެވެ.

މިކަމާ މެދު ރައީސުލްޖުމްހޫރިއްޔާއަށް ހިލަމެއް ނުވާ ކަމަށް އެމަނިކުފާނު ވިދާޅުވިއެވެ. އަދި މައްސަލަ ބެލޭނީ އެފަދަ މައުލޫމާތެއް ލިބުނު ނަމަ ކަމަށް ވިދާޅުވިއެވެ. ކޮންމެ އަކަސް "ހީނާ ސްޕާއިން" ކުރި ބޮޑު ވައްކަން ފަޅާ އެރުވިކަމުގެ ތުހުމަތުގައި އެތަނުގެ ޑީސީއީއޯ ޝިއުނާ އަހުމަދު މަގާމުން ވަކިކޮށް ނުވީތާކަށް މަގާމުވެސް އުވާލިކަމަށް ރަށުތެރޭގައި ކިޔަން ފެށިއެވެ. މއީ އަޅުގަޑު ކުރިން ބުނި ހިސާބަށް އޮޑި ދަތުރުކުރުމެވެ. "ވިސްލް ބްލޯ" ކުރި މީހާ "ތްރޯ"ކޮށްލީތާއެވެ.

އޭގެ ފަހުން ވެސް ސަރުކާރު ތެރެއިން ކުރަމުން ދިޔަ އައްޗިކަންކަން ކަމަކަށް ފަހު ކަމެއް ދިޔައީ ހާމަވަމުން ތިލަވަމުންނެވެ. ނަމަވެސް އަބަދުވެސް އެކަން ކުރަން ޖެހެނީ އާންމު ރައްޔިތުންނަށެވެ. ސަރުކާރުގެ ވެރިއަކަށް ނުވަތަ ގައުމުގެ ވެރިމީހާއަށް އެކަންކަމުގެ ހިލަމެއް ނުވެއެވެ. އެނގޭކަމަށްވެސް ނުވެއެވެ. އެނގުނީމާ ލޮލަށް ނިދި ނާންނަ ކަމަށްވެއެވެ. ފަހަރުގައި ނިދީ އެ ނާންނަނީ ބައިވެރިވުން އޮތްލެއް ބޮޑުކަމުން ކަމަށްވެސް ވުން އެކަށީގެންވެއެވެ.

ކޮންމެ އަކަސް މިއަދު މީޑިޔާގައި ތިލަވީ އަނެއްކާވެސް ސަރުކާރުގެ ތެރެއިން ކޮށްފައިވާ ބޮޑު ވައްކަމެއްގެ ވާހަކައެވެ. އެގޮތުން މޯލްޑިވްސް ވޯޓަރ އެންޑް ސެވަރޭޖު ކޮމްޕެނީގެ ސަބް ކުންފުނި އައިލެންޑް ބެވަރޭޖު މޯލްޑިވްސްގެ ތެރެއިން ވެސް މާސިންގާ ވައްކަމެއް ކޮށްފިކަމަށް މީޑިޔާ ރިޕޯޓުތައް ތިލަވިއެވެ.

އައިބީއެމްއަށް ލޭބާ އެކޮމޮޑޭޝަނެއް ފަސް އަހަރު ދުވަހަށް ކުއްޔަށް ދޫކުރުމުގައި ވަނީ ކޮރަޕްޝަން ހިންގާފާކަން ސޯޝަލް މީޑިއާގައި އާންމުވެފައިވާ މައުލޫމާތުތަކުން އެނގެއެވެ. އެ މައުލޫމާތު ހާމަވާގޮތުގައި އައިބީއެމްއިން އެކޮމޮޑޭޝަން ބްލޮކް ފަސް އަހަރު ދުވަހަށް ކުއްޔަށް ނެގީ ޓެލެ މޯލްޑިވްސް ކިޔާ ކުންފުންޏެއް މެދުވެރިވެގެން ބިޑިން ޕްރޮސެސްއަކާ ނުލައި މަހަކު ދެ ލައްކަ ރުފިޔާ ދައްކާ ގޮތަށެވެ.

އައު އެއްބަސްވުން ހެދީ އިތުރު ފްލޯއެއް ވެސް ކުއްޔަށް ނަގާ ގޮތަށް، އެތަނުގެ މާރާމާތަށް އައިބީއެމްއިން ހަރަދު ކުރާ ގޮތަށްކަން އެއްބަސްވުމުން އެނގެއެވެ.

އައިބީއެމްއިން ލޭބާ އެކޮމޮޑޭޝަން ކުރިން ކުއްޔަށް ނަގާފައި ހުރީ މަހަކު 60،000ރ. ދޭ ގޮތަށްކަން ލިޔުންތަކުން އެނގޭއިރު، އެ ލޭބާ އެކޮމޮޑޭޝަން ވެސް ކުއްޔަށް ނެގީ ޓެލެ މޯލްޑިވްސް އިންނެވެ.

އައިބީއެމްއިން ލޭބާ އެކޮމޮޑޭޝަންގެ އެއްބަސްވުން ފުރަތަމަ ހަދާފައި ވަނީ މިދިޔަ އޮގަސްޓް 27، ގަ އެވެ. ނަމަވެސް އެ އެއްބަސްވުން ބަދަލުކޮށް އާ އެއްބަސްވުމުގައި ސޮއިކުރީ މިދިޔަ އޮކްޓޯބަރު 22، ގަ އެެވެ. އަދި ފަހުން އައު ކުރި އެއްބަސްވުމުގެ ދަށުން ކުއްޔަކީ 2 ލައްކަ ރުފިޔާއަށެވެ. މިކަން ވެސް މީސް މީޑިޔާއަށް ތިލަވުމާ އެކު އެމްޑަބްލިޔުއެސްސީގެ އެމްޑީ އަބްދުލް މަތީނު އަވަހަށް އެކަމުން ރެކެން ވެގެން ވިދާޅުވެފައިވަނީ އެކަންކަން މީސްމީޑީޔާއަށް ތިލަވުމުގެ އެކަން ބަލާ ފިޔަވަޅު އަޅާ އެއްބަސްވުން ބާތިލްކުރަން އަންގާފައިވާ ކަމަށެވެ. ނަމަވެސް މިކަން އަޅުގަޑުމެން ރައްޔިތުން ހަމަ ގަބޫލުކުރަންވީތޯއެވެ؟ އެފަދަ ބޮޑުކަމެއް ވެގެންދިޔައިރު، ހާމަކަން ބޮޑުކަމަށް ދައުވާކުރާ ސަރުކާރުން ރައްޔިތުންނަށް ހޭވެސް އަނޣާނުލައެވެ. ދެން ވެރިން ބުނާނެ ތޯއްޗެކެވެ. ސަރުކާރު ތެރެއިން ހިނގާ ހުރިހާ ކަމަކީ ރައްޔިތުންނަށް އެނގެން ޖެހޭ ކަމެއް ނޫނޭ އެވެ. ނަމަވެސް ރައީސް މުއިއްޒު ކެޕްމެއިން ތެރޭގައި އަމިއްލަފުޅަށް ވިދާޅުވިއެވެ. " ރައްޔިތުންނަށް ކަންކަން ފޮރުވާނެ މީހަކަށް އަޅުގަޑު ނުވާނަމެވެ. ކޯއްޗެއްތޯ ފޮރުވަންވީ،" މިހެންނެވެ.

ކޮންމެ އަކަސް ވައްކަންކޮށް ހިތް ފުރުނީމާ ދެން އެއްބަސްވުންތައް ބާތިލުކުރުމުން އެއީ ނުވާކަކަށް ވާނެބާއެވެ؟ ނޫނީ ވައްކަން ނުކުރާކަމަށްވާނެ ބާއެވެ؟ ފަހަރުގައި ވައްކަންކުރުމަށް ފަހު އެއްބަސްވުންތައް ބާތިލުކުރުމަކީ ކޮރަޕްޝަންއިން ރެކެން އޮތް ލައިންސަސެއްގެ ގޮތުގައި މި ސަރުކާރުގެ ވެރިންނަށް ފަހުމުވެފައިވަނީ ތޯއްޗެކެވެ.