ކުރިއަށް އޮތް ރައްޔިތުންގެ މަޖިލީހުގެ އިންތިހާބުގެ ރީ-ރެޖިސްޓްރޭޝަން ކުރިއަށް ދާ މި ދުވަސްވަރު އެކަމަށް ކެންޑިޑޭޓުންނާ އަދި ރައްޔިތުންވެސް ވަރަށް ބޮޑަށް ފާރަވެރިވާން ޖެހޭ ކަމަށް، ރައީސް އަބްދުﷲ ޔާމީން އަބްދުލްގައްޔޫމު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ރައްޔިތުންގެ މަޖިލީހަށް އެމަނިކުފާނުގެ ތާއީދާއެކު ނުކުންނަ ކެންޑިޑޭޓުންގެ ސިޔާސަތު ހާމަކުރުމަށް ބާއްވާ ޖަލްސާތަކުގެ ތެރެއިން ބުރާސްފަތި ދުވަހުގެ ރޭގެ ޖަލްސާގައި ވާހަކަ ދައްކަވަމުންނެވެ.

މިދިޔަ ރިޔާސީ އިންތިހާބުގައިވެސް ރީ ރަޖިސްޓްރޭޝަންގެ މައްސަލަތަކެއް ހިނގާފައިވާތީ މި ފަހަރުގެ މަޖިލީހުގެ އިންތިހާބުގައި އެކަމަށް ވަރަށް ބޮޑަށް ކެންޑިޑޭޓުން ސަމާލުކަން ދޭން ޖެހޭ ރައީސް ޔާމީން ވަނީ ވިދާޅުވެފައެވެ.

ރައީސް ޔާމީން ވަނީ 2018ގެ ރިޔާސީ އިންތިހާބުގައިވެސް ކަންކަން ހިނގާ ދިޔަ ގޮތް ހަނދާން އައުކޮށް އެފަދަ ކަންކަން ތަކުރާރު ވިޔަ ނުދިނުމަށް އެމަނިކުފާނުގެ ޓީމުން ހުށިޔާރުވާން ވަނީ ވިދާޅުވެފައެވެ.