ރައީސް ޑރ މުހައްމަދު މުއިއްޒުގެ ސަރުކާރު ރޫޅުމުގެ ބިރު ހީވާން ފަށައިފި ކަމަށް ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

މަލީހު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

މަލީހު ވިދާޅުވެފައިވާ ގޮތުގައި ސަރުކާރު ތެރޭގައި އެކި ލެވެލްގައި ދަނީ ބޮޑެތި އަރާރުން ވަމުން ކަމަށެވެ. އެ ސަކަރާތް ގަނޑު ތެރޭގައި މުޅި ސަރުކާރު ބިރު ހީވާން ފަށައިފާ ކަމަށްވާ ކަމަށްވެސް މަލީހު ވަނީ ވިދާޅުވެފައެވެ.

މަލީހު ވަނީ ރައްޔިތުން ތިބީ ތައްޔާރާ ތޯ އައްސަވާ ސުވާލެއްވެސް އަމާޒުކުރައްވާފައެވެ.

ވާން އުޅޭ ގޮތް ސާފު ނުވި ނަމަވެސް މަލީހު މިފަދައިން ވިދާޅުވެފައި މިވަނީ، ސަރުކާރުގެ ވެރިންގެ މެދުގައި ބޮޑެތި ޚިޔާލު ތަފާތުވުންތައް އުފެދި ސަރުކާރު ތެރޭގައި ރެނދު ލާފައިވާ ކަމަށް އަޑު ގަދަވެފައިވާ ދަނޑިވަޅެއްގައެވެ.