ވެލާނާ އިންޓަނޭޝަނަލް އެއާޕޯޓުން ލައްކައަކަށް ވުރެ ގިނަ ޑޮލަރު ފޭރުނު މައްސަލައިގައި ހައްޔަރުކުރި ހަތަރު މީހުންގެ ޝަރީއަތް ނިމެންދެން ބަންދުކުރަން ކޯޓުން މިއަދު އަމުރުކޮށްފިއެވެ.

މޫނު ނިވާކޮށްގެން ތިބި ބަޔަކު ވެލާނާ އިންޓަނޭޝަނަލް އެއާޕޯޓު ތެރެއިން ފައިސާ ހުރި ސުއިޓްކޭސްތަކެއް ފޭރިފައިވަނީ އޮކްޓޯބަރ މަހުގެ 27 ވަނަ ދުވަހުގެ ފަތިހު 4:45 ހާއިރުއެވެ. މިމައްސަލައިގައި ޝާމިލުވާ ހަތަރު މީހުން ހަމަ އެދުވަހު ވަނީ ފުލުހުން ދެނެގަނެފައެވެ.

އެ ހަތަރު މީހުންގެ ބަންދަށް ޖެހި ފަސް ދުވަހުގެ މުއްދަތު ހަމަވަމުން، ކޯޓަށް ހާޒިރުކުރުމުން ޝަރީއަތް ނިމެންދެން ބަންދުކުރަން އަމުރުކޮށްފައިވާކަމަށް މިއަދު ފުލުހުން ވަނީ ބުނެފައެވެެ.

މި މައްސަލައިގެ ތުހުމަތުގައި ހައްޔަރުކުރި މީހުންނަކީ ރޭޝަމް / ލ.މާވަށް، މާޒިން މޫސާ (25އ) އާއި މ. ކޯރަސް / މާލެ، އަޙްމަދު ރައިހާން ނަޢީމް (20އ)، އަޅިވިލާގެ / ކ.ގުރައިދޫ، އިބްރާހީމް އަނޫފް (24އ) އަދި އަޅިވިލާގެ / ކ.ގުރައިދޫ، ޙުސައިން ޝަހުދު (30އ) އެވެ.

މީގެ އިތުރުން މި ފޭރުމުގައި ބޭނުންކުރި ލޯންޗް ހޯދައި ފުލުހުންގެ ބެލުމުގެ ދަށަށް ގެނެސްފައިވެއެވެ. އެހެންނަމަވެސް ފޭރުނު ޑޮލަރު އަދިވެސް ފުލުހުންނަށް ހޯދިފައިނުވެެއެވެ.