ގައުމުގެ ތާރީހު ކުދިންގެ ގައިގައި އަށަގެންނެވުމަށް ޓެކްނޮލޮޖީ ބޭނުން ކުރަން ޖެހޭކަމަށް ޕީޕަލްސް ނޭޝަނަލް ފްރަންޓް (ޕީއެންއެފް) ސެނެޓާރ މުޙައްމަދު މައިޒަރު އާދަމް ޒާހިރު ވިދާޅުވެއްޖެއެވެ.
މައިޒަރު މިފަދައިން ވިދާޅުވީ ޗެނަލް 13 އިން ކުރިއަށް ގެންދިޔަ ނަސްރުގެ ދުވަހުގެ ހާއްސަ ކަވަރޭޖުގައި ވާހަކަދައްކަމުންނެވެ.
ނަސްރުގެ ދުވަހާ މެދު ދިވެހި ޒުވާނުން އަދި އަންނަން އޮތް ޖީލު ހޭލުންތެރި ކުރުވުމުގެ މުހިއްމު ކަމާމެދު ވާހަކަފުޅުދައްކަވަމުން މައިޒަރު ވިދާޅުވީ މިފަދަ ކަންކަމުގައި ޓެކްނޮލޮޖީގެ ބޭނުން ކުރުން މުހިއްމުކަމަށެވެ.
ކުރު ފިލްމު ނުވަތަ ކާޓޫނުތައް ހަދައިގެން މި ފިލްމުތައް ޅަފުރާގެ ކުދިންނަށް ދެއްކުމުން ގައުމަށް ކުރިމަތިވެގެންގޮސްފައިވާ މިފަދަ މުހިންމު، ތާރީޚީ ކަންކަމާމެދު އެކުދިން ހޭލުންތެރިވާނެ ކަމަށް މައިޒަރު ފާހަގަކުރެއްވިއެވެ.
އަދި ކާޓޫނުތައް ހެދުމަކީ އަމިއްލަ ފަރުދުންގެ ޖީބުން ޚަރަދުކޮށްގެން ކުރެވޭ ފަދަ ކަންކަމެއް ނޫންކަމަށްވެސް މައިޒަރު ވިދާޅުވިއެވެ. އަދި ސަރުކާރުގެ ޗެނެލް މިހާރު މިވަނީ ވެރިމީހާ އަދި ފަސްޓު ލޭޑީ ޕްރޮމޯޓު ކުރުމަށް ހާއްސަވެފައިވާ ޗެނެލަކަށް ވެފައިވާކަން މައިޒަރު ފާހަގަކުރެއްވިއެވެ.
ނަމަވެސް ދައުލަތުގެ ޓީވީއިން މިފަދަ ޕްރޮގްރާމުތައް އަދި ކާޓޫނުތައް ދެއްކަުމުގެ މުހިއްމުކަމަށްވެސް އަލިއަޅުވާލާފައިއެވެ.
ފިލްމުތަކާއި ކާޓޫނުތަކުގެ އިތުރުން ގައުމީ ކަންކަމާ ގުޅުވައިގެން ސްކޫލުކުދިންނަށް ހާއްސަ މުބާރާތްތައް ކުރިއައް ގެންދިއުމަކީވެސް އަންނަން އޮތް ޖީލުތަކަށް ގައުމުގެ ތާރީޚު އުގަންނުވައިދީ އެކުދިންގެ ހިތްތަކުގައި ގައުމަށް ލޯބި އުފެދުމުގައި މުހިންމި ދައުރެއް އަދާކުރާނެ ކަންތައްތައް ކަމުގައިވެސް މައިޒަރު ވިދާޅުވިއެވެ.
