ތަރައްޤީ އަކީ ކޯއްޗެއްކަން ދިވެހިރާއްޖޭގެ ރައްޔިތުންނަށް އެނގިގެންދިޔައީ ރައީސް އަބްދުﷲ ޔާމީން އަބްދުލްގައްޔޫމްގެ ޒައާމަތުގައި ކަމަށް އެމަނިކުފާނުގެ ޕާޓީގެ ފަރާތުން 20 ވަނަ ރައްޔިތުންގެ މަޖިލީހަށް އަލިފުށީ ދާއިރާއަށް ވާދަކުރައްވާ އިބްރާހިމް އަބްދުލްކަރީމް (މަންޑޭ) ވިދާޅުވެއްޖެއެވެ.

މަންޑޭ މިފަދައިން ވިދާޅުވެފައިވަނީ ފްރޮންޓް އޮފީހުގައި މަޖިލިސް އިންތިޚާބަށް އެ ޕާޓީގެ ފަރާތުން ކުރިމަތިލާފައިވާ ކެންޑިޑޭޓުންގެ ސިޔާސަތު ހުށަހެޅުމަށް ސިލްސިލާގޮތެއްގައި ބާއްވަމުން އަންނަ ޖަލްސާ ތަކުގެ ތެރެއިން ބުރާސްފަތި ދުވަހުގެ ރޭ ބޭއްވި ޖަލްސާގައި ވާހަކަދައްކަވަމުންނެވެ.

އެގޮތުން މަންޑޭ ވިދާޅުވީ 2013 ވަނަ އަހަރުން ފެށިގެން 2018 ވަނަ އަހަރަށް ރައީސް ޔާމީން ވަނީ ރާއްޖޭގެ ތަރައްގީއަށާއި އިގްތިޞާދަށް އިންގިލާބެއް ގެނެސްދެއްވާފައިކަމަށެވެ.

އޭގެއިތުރުން މަންޑޭ ވަނީ ރައީސް ޔާމީންގެ ޒައާމަތުގެ ފަސް އަހަރާއި ނިމިދިޔަ ސަރުކާރުގެ 5 އަހަރާ އަޅައި ކިޔުއްވާފައެވެ.

އޭގެއިތުރުން މަންޑޭ ވިދާޅުވީ ތަރައްގީ އަކީ މަޖިލިސް މެޖޯރިޓީ ލިބުމުން ގެނެވޭނެ އެއްޗެއް ނޫންކަމަށެވެ.

މަޖިލިސް އިންތިޚާބާ ދިމާކޮށް އަދުގެ ސަރުކާރުން ރަށްރަށަށް ވަޑައިގެން ވައުދުތައް ވަމުން އަންނަ އިރު ބުނަމުން ދަނީ ރާއްޖެއަށް ތަރައްގީ ގެނެސްދެވޭނީ ސަރުކާރަށް 20 ވަނަ ރައްޔިތުންގެ މަޖިލިސް އިންތިޚާބް ކާމިޔާބުވުމުންނެވެ.