އިންޑިޔާ ސިފައިން ދިވެހި މަސްދޯނިތަކަށް އެރީ ދިވެހިރާއްޖެއަށް ނުގުޅިގެން ކަމަށް ކުރީގެ ޑިފެންސް މިނިސްޓަރ މާރިޔާ ދީދީ ވިދާޅުވެއްޖެއެވެ.

މާރިޔާ މިފަދައިން ވިދާޅުވެފައިވަނީ ހުކުރު ދުވަހުގެ ރޭ މޯލްޑިވިއަން ޑިމޮކްރެޓިކް ޕާޓީ ( އެމްޑީޕީ) އިން ބޭއްވި ދޮގު ޑޮލަނގު ޖަލްސާގައި ވާހަކަދައްކަވަމުންނެވެ.

އެގޮތުން މާރިޔާ ވިދާޅުވީ އިންޑިޔާގެ ކޯސްޓްގާޑުން ދިވެހި މަސް ދޯނިތަކަށް އެރީ އެމީހުންނަށް ރާއްޖޭގެ ޕޮއިންޓަށް ގުޅުމުން ފޯނު ނުނެގުމާއި ގުޅިގެންކަމަށެވެ.

މާރިޔާ ބުނިގޮތުގައި އެ ޕޮއިންޓްގައި ފޯނު ނަގަން އިންނަންޖެހޭ މީހަކު ނެތުމުގެ ސަބަބުން އެ ސަރަހައްދުގައި ކަމެއް ހިނގީކަމަށް ހީކޮށް އިންޑިޔާގެ ކޯސްޓު ގާޑުންނަށް އެ ސަރަހައްދަށް ދިޔުން މަޖުބޫރުވީކަމަށެވެ.

އިތުރަށް މާރިޔާ ވިދާޅުވީ ރާއްޖޭގެ އުތުރަކީ އިންޑިޔާގެ ވެސް ސަރަހައްދެއްކަމަށެވެ.

މި ސަރުކާރުންނަށް ސަތޭކަ ދުވަސްވީއިރުގައިވެސް އިންޑިޔާ ސިފައިން ބޭލިފައި ނުވާކަމަށް މާރިޔާ ވިދާޅުވި އިރު ރާއްޖޭގައި އިންޑިޔާ ސިފައިން ގެނެސްގެން ގާއިމް ކުރީ ވެސް މާރިޔާ ދީދީ އިސްވެ ހުންނަވާ އިންޑިޔާ އާއެކު ހެދި ސިއްރު އެއްބަސްވުންތަކުގެ ސަބަބުންނެވެ.

މާރިޔާ ދީދީ ވަނީ މީގެ ކުރިން ރާއްޖޭގައި އިންޑިޔާގެ ސިފައިންނެއް ނުތިބޭނެ ކަމަށް ވިދާޅުވެފައެވެ. ނަމަވެސް ފަހުން ވަނީ އިންޑިޔާ ސިފައިން ތިބީ ރާއްޖޭގައި ޑޯނިޔާ ދުއްވަން ކަމަށް ވިދާޅުވެ ސިފައިން ތިބިކަމަށް އެއްބަސްވެފައެވެ.

އަދި އިންޑިޔާ ސިފައިން އަނބުރާ އެ ގައުމަށް ފޮނުވާލާފިއްޔާ އެ ގައުމާއެކު އޮންނަ ގުޅުން ހީނަރުވެ ރާއްޖެ އަށް އެ ގައުމުން ގެންނަ ބިހާއި، ފިޔާ ފަދަ ތަކެތި ލިބުމުގައި ދަތިވެދާނެކަމަށްވެސް މާރިޔާ ވަނީ މީގެ ކުރިން ބުނެފައެވެ. މިކަމާ ގިނަ ފަރާތްތަކުން ވަނީ މާރިޔާ އަށް ފާޑުކިޔުން އަމާޒުކޮށްފައެވެ.