ރައީސް ޑރ މުހައްމަދު މުއިއްޒުގެ އަމަލުތައް ވައްތަރީ ރާއްޖޭގެ މަޝްހުރު ކޮމެޑިއަން ޔޫސުފް ރަފީއު (ޔޫސޭ)ގެ ޑްރާމާ ސީރިއަލް "ދިރިއުޅުމަކީ މިއީބާ"އާ ކަމަށް ވިދާޅުވެ ޕީޕަލްސް ނެޝަނަލް ފްރޮންޓު (ޕީއެންއެފް)ގެ ސެކެރެޓަރީ ޖެނެރަލް މުހައްމަދު މަލީހު ޖަމާލުގެ ފާޑުވިދާޅުވުން އަމާޒުކުރައްވައިފިއެވެ.

މަލީހު މިފަދަ ގޮތަކަށް ރައީސް މުއިއްޒަށް އަމާޒުކުރައްވާ ފާޑުވިދާޅުވެފައި މިވަނީ އެކްސްގައި ކުރެއްވި ޕޯސްޓެއްގައެވެ.

އެގޮތުން ރައީސް މުއިއްޒު އިހަކަށް ދުވަހު ފުވައްމުލަކު ސިޓީއަށް ވަޑައިގެން ރިބަން ކަނޑުއްވައިދެއްވި ބޭންކް އޮފް މޯލްޑިވްސްގެ ޑޮލަރު އޭޓީއެމް މެޝިންގެ ޚިދުމަތް އެމަނިކުފާނު އެ ސިޓީއިން ފުރާވަޑައިގަތުމާ އެކު ޚިދުމަތް މެދުކެނޑިފައިވާ ކަމަށް ބުނާނެ މީހަކު ސޯޝަލް މީޑިޔާގައި ހިއްސާކޮށްފައިވާ ޕޯސްޓެއް ހިއްސާކުރައްވާ މަލީހު ވަނީ އެކަމާ ގުޅިގެން ފާޑުވިދާޅުވެފައެވެ.

މަލީހު ވިދާޅުވި ގޮތުގައި، ރައީސް މުއިއްޒުގެ އަމަލުތަކާ ވާހަކަތަކާ މެދު ވެސް އިތުބާރު ގެއްލިފައިވާ ކަމަށާ އަމަލުތަކުން ބޮޑަށް ފެންނަނީ އަދި އަމަލުތައް ބޮޑަށް ވައްތަރީވެސް ޔޫސޭގެ "ދިރިއުޅުމަކީ މިއީބާ" ޑްރާމާޔާ ކަމަށެވެ.

މަލީހު އިތުރަށް ވިދާޅުވެފައިވަނީ، ރައީސް މުއިއްޒު ދައްކަވާ ވާހަކަފުޅުތައް ސީރިއަސްކޮށް ނެގުމުގެ ބޭނުމެއް ނެތް ކަމަށެވެ.

މަލީހު މިފަދައިން ވިދާޅުވެފައިވާއިރު ރައީސް މުއިއްޒަކީ ބަހާ އަމަލާ ދިމާ ނުވާ ވެރިއެއްގެ ގޮތުގައި ގިނަ ބަޔަކު ސިފަކުރާކަން ފާހަގަކޮށްލެވެއެވެ.