މިހާރުގެ ސަރުކާރުން ފެއްޓެވި މި ސަރުކާރުގެ މެޖަ ޕްރޮޖެކްޓް ކަމަށްވާ “ރަސްމާލެ” ހިއްކާ މާލެ ސިޓީއާއި ގުޅުވާލާނީ އަންޑަވޯޓާ ޓަނަލްއަކުން ކަމަށް މުއިއްޒު ވިދާޅުވެފައިވާއިރު މި މަޝްރޫއު މިހާރު ވާނުވާ ޖަހާފައި އޮތްވާ ފެނުގެ މަތިން އުދުހޭ ބޯޓެއް ރާއްޖެއަށް ގެނައުމުގެ މަސައްކަތް ފަށައިފިއެވެ.
އިލެކްޓްރިކް ވެހިކަލްތަކާ ގުޅޭ މައުލޫމާތު ގެނެސްދޭ މަޝްހޫރު "އިލެކްޓްރިވް" ވެބްސައިޓުގައި އިއްޔެ ރިޕޯޓުކޮށްފައި ގޮތުގައި، ރާއްޖޭގެ ޓުއާ އޮޕަރޭޓަރު، އީގޯ ޝަޓުލް އިން ވަނީ "ކެންޑެލާ ޕީ-ޓުވެލް" މޮޑެލްގެ 10 ބޯޓަށް އޯޑަރު ދީފައެވެ.
މި ބޯޓުތައް ރާއްޖެ ގެނެސް، ވެލާނާ އިންޓަނޭޝަނަލް އެއާޕޯޓާއި މާލެ ކައިރި ރިސޯޓުތަކާ ދެމެދު ދަތުރު ކުރާނެކަމަށް މައުލޫމާތު ލިބިފައިވެއެވެ.
ކެންޑެލާ ކުންފުނިން ހާމަކޮށްފައިވާ ގޮތުގައި، މި ބޯޓުތަކުގައި ބޭނުންކުރާ ޒަމާނީ ޓެކްނޮލޮޖީގެ ސަބަބުން ހަކަތަ ބޭނުންކުރާ މިންވަރު 80 އިންސައްތައަށް ކުޑަކޮށްދެއެވެ. ބެޓަރީގެ އެހީގައި ދުއްވާ މި އިލެކްޓްރިކް ބޯޓުތަކަށް ތެޔޮ އެޅުމުގެ ބޭނުމެއް ނެތުމުގެ ސަބަބުން ޖައްވަށް ދޫކޮށްލެވޭ ކާބަންގެ މިންވަރު ވެސް ވަރަށް ބޮޑަށް ދަށްވެގެންދާނެއެވެ.
ސަރުކާރުން އެކި ނަން ނަމުގައި ބޮޑެތި މަޝްރޫއުތައް އިއުލާންކުރައްވާ ދުވަސްކޮޅެއްގެ ތެރޭގައި މި މަޝްރޫއުތައް ހުއްޓި ދައުލަތުގެ ބަޖެޓަށް ބާރު ބޮޑުކުރުމުގެ ބަދަލުގައި ރައްޔިތުންނަށް ލުއި ފަސޭހަ “ރިއަލިސްޓިކް” މަޝްރޫއުތައް ހިންގުމަށް އާންމުން އަބަދުވެސް އަންނަނީ ގޮވާލަމުންނެވެ.
އިލެކްޓްރިވް އިން ބުނި ގޮތުގައި، ސްވިޑަންގެ ސްޓޮކްހޯމްގައި މިހާރު ވެސް އާންމު ދަތުރުފަތުރުގައި "ޕީ-ޓުވެލް" ބޭނުން ކުރެއެވެ. ރާއްޖެއަށް މި ބޯޓުތައް ގެނައުމުގެ ކުރިން ވެސް، އިންޑިއާ އާއި ތައިލެންޑުން ވެސް މިހާރު ވަނީ މި ބޯޓުތަކަށް އޯޑަރު ދީފައެވެ.
