ވެރިކަން ކުރާ ޕީއެންސީ ސަރުކާރުން މަޑަވެލި ދާއިރާ އެއްވެސް ކަމެއް ކޮށްނުދޭ ކަމަށާއި އެހެންކަމުން މި ސަރުކާރަށް އަތް ޖެހޭކަށް ނެތް ކަމަށް ޕީއެންސީއަށް ނިސްބަތްވާ އެ ދާއިރާގެ މެންބަރު މުހައްމަދު ޝަމީޒް ވިދާޅުވެއްޖެ އެވެ.
މަޖިލީހުގައި މިހާރު ކުރިއަށްދާ ބަޖެޓު ބަހުސްގައި ވާހަކަދައްކަވަމުން ޝަމީޒް ވިދާޅުވީ މި ބަޖެޓު ތެރެއިން މަޑަވެއްޔަށް ދިމާވެފައިވާ ޖާގައިގެ ދަތިކަން ހައްލުކުރަން ބިން ހިއްކި، ބޯހިޔާވަހިކަމުގެ މައްސަލަ ހައްލުކުރަން ގެދޮރު ދެވިގެންދާނެ ކަމަށް އުންމީދުކުރާ ކަމަށެވެ.
ނިމިދިޔަ އެމްޑީޕީ ވެރިކަމުގައިވެސް އަދި މި ވެރިކަމުގައިވެސް އެ ދާއިރާގެ ތިން ރަށުގެ ހާލަތު ބަޔާންކޮށްދެމުން އަންނައިރުވެސް މި ސަރުކާރުން ވެސް މަޑަވެއްޔަށް އެއްވެސް ކަމެއް ކޮށްނުދޭކަން ޝަމީޒް ވަނީ ފާހަގަކޮށްފައެވެ.
ވޭތުވެދިޔަ ދެ އަހަރުގެ ބަޖެޓުގައި ވެސް، އަބަދު ވެސް ބަޖެޓުގެ ބަހުސްގައި އަޅުގަނޑުގެ ދާއިރާގެ ތިން ރަށުގެ ހާލަތު ބަޔާންކޮށްދެން. އެހެން ނަމަވެސް އެއްވެސް ވަރަކަށް. އަދި މި ސަރުކާރުން ވެސް މަޑަވެއްޔަށް ކަމެއް ކުރެވިފަ ނެތް ވާހަކަ ވެސް ފާހަގަކުރަން
ޝަމީޒް ވިދާޅުވި އެވެ.
ބަޖެޓުގައި އަކުރުތަކެއް ޖަހާފައި އޮތް ނަމަވެސް އެކަން ތަންފީޒު ނުކުރެވޭނަމަ ބަޖެޓު ވެގެންދަނީ ހަމައެކަނި ޖަހާލާ އަދަދުތަކަށް ކަމަށާއި 3،000 މީހުންގެ އާބާދީއެއް އޮތް މަޑަވެލީގައި ނަރުދަމާގެ އެއްވެސް ކަހަލަ ހިދުމަތެއް ނުލިބޭ ކަމަށްވެސް ޝަމީޒުގެ ވާހަކައިގައި ފާހަގަކޮށްފައިވެއެވެ.
ސަރުކާރުގެ ކަންކަން މިފަދައިން ދާނަމަ ސަރުކާރަށް ތާއީދުކޮށް އަތްޖެހެން ނެތް ކަމަށް ޝަމީޒު ވަނީ ގޮވާލާފައެވެ. އަދި ރައްޔިތުންގެ ހައްގުތައް ކަށަވަރުކޮށް އެ ރައްޔިތުން ބޭނުންވާ ކަންކަން ފުރިހަމަ ކުރޭތޯ މަޖިލިސް މެންބަރުން ބަލައި އެ ވާހަކަ ދައްކަން ޖެހޭ ކަމަށް ވެސް ޝަމީޒް ވިދާޅުވި އެވެ.
