ހަރަދު ބޮޑުވާނެކަމަށް ބުނެ މަސްވެރިންނަށް ދިމާވި އެތައް މައްސަލައެއް ހައްލު ނުކުރާކަމަށް ފިޝަރީޒް މިނިސްޓަރ އަހުމަދު ޝިޔާމް އެއްބަސްވެއްޖެއެވެ.

މަސްވެރިންގެ ކަންބޮޑުވުންތައް އަޑުއަހައި، އެ ޝަކުވާތަކަށް ހައްލެއް ގެނެސްދިނުމަކީ މި ސަރުކާރުގެ އެންމެ ބޮޑު ރިޔާސީ ވައުދެވެ. އެހެންނަމަވެސް އެ ވައުދު ފުއްދުމުގައި މި ސަރުކާާރު ވަނީ ނުކުޅިދިފައެވެ.

އެގޮތުން މަސްވެރިން ބާނާ މަހަށް ވަގުތުން ފައިސާ ލިބޭނެ އިންތިޒާމުތައް ހަމަޖެއްސުމާއި އެންމެ ބޮޑު އެއް މައްސަލަކަމަށްވާ، އައިސް ލިބުމުގެ ދަތިތައް ހައްލު ކުރުން ހިމެނެ އެވެ.

ސަންގުޓީވީން ގެނެސްދިން ”ރައީސް މުއިއްޒާއި އެކު ދެ އަހަރު“ ހާއްސަ ކަވަރޭޖުގައި ވާހަކަ ދައްކަވަމުން ޝިޔާމް ވަނީ މީގެން ގިނަ ކަންކަން ނުކުރެވޭކަމަށް އެއްބަސްވެފައެވެ.

ސްވެރި ސިނާއަތަށް ދިމާވެފައިވާ މައްސަލަތައް ހައްލުކުރުމަށް އެންމެ މުހިންމު އެއްޗަކީ ފައިސާ ހޯދުންކަމަށް މިނިސްޓަރ ވިދާޅުވިއެވެ. މަސްވެރި ސިނާއަތައް ދިމާވެފައިވާ ބޮޑެތި މައްސަލަތައް ކުރީ ސަރުކާރުތަކަށް ވެސް ދެނެގަނެވިފައިވާކަމަށް ޝިޔާމް ވިދާޅުވިއެވެ. އެކަމަކު އެއީ ހަރަދު ބޮޑު މަސައްކަތެއްކަމަށް ބަލައި، ސަރުކާރުތަކުން އެދެވޭ ހައްލެއް ގެނައުމަށް އެއްވެސް މަސައްކަތެއް ނުކުރާކަމަށް ވިދާޅުވި އެވެ.

ސަރުކާރުން ކުރާ އެހެންކަންކަމުގައި ބޭކާރު ހަރަދުކުރަންވީމާ ފައިސާ ހުރެއެވެ. މަސްވެރިންގެ ކަންބޮޑުވުންތައް ހައްލުކުރުމުގައި ހަރަދު ބޮޑުވާނެކަމަށް ބުނުމުން ޝިޔާމަށް މަސްވެރިން އަންނަނީ ފާޑުކިޔުން އަމާޒުކުރަމުންނެވެ.