ފަލަސްޠީނުގެ ޣައްޒާގެ އުތުރުގައިވާ ސަރަހައްދުތަކަށް ބޭހާއި ޞިއްޙީ ފަރުވާގެ ސާމާނު ފޯރުކޮށްދިނުމަށް ދުނިޔޭގެ ޞިއްޙަތު ޖަމުޢިއްޔާއިން ކުރަމުންދިޔަ މަސައްކަތްތައް މެދުކަނޑައިލަން މަޖުބޫރުވެފައިވާކަން އެ ޖަމުޢިއްޔާއިން ހާމަކޮށްފިއެވެ.


އެ ޖަމުޢިއްޔާއިން ބުނީ އެ މަސައްކަތްތައް ހުއްޓުމަކަށް އައިސްފައި ވަނީ އެ ސަރަޙައްދަށް އެހީގެ ސާމާނު ފޯރުކޮށްދޭން ޙަރަކާތްތެރިވާ ޓީމުތަކާއި އުޅަނދުތަކަށް އެއްވެސް ރައްކާތެރި ކަމެއް ނެތުމުން ކަމުގައެވެ.

އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީ އިސްތިޢުމާރީ ފައުޖުން ފެށި ލާއިންސާނީ ޢުދުވާނުގެ ސަބަބުން ޣައްޒާގެ އުތުރުގައިވާ ގިނަ ސަރަޙައްދުތައް ވަނީ ސުންނާފަތި ކޮށްލާފައެވެ. އަދި ޣައްޒާއަށް އެއްގަމު މަގުން އަރައި، ޔަހޫދީ ފައުޖުގެ ސިފައިން ދަނީ އެ ސަރަޙައްދަށް ވަރުގަދަ ޙަމަލަތަކެއް ދެމުންނެވެ. ލާއިންސާނީ ހަމަލާތަށް ޔަހޫދީން ހިންގަމުންދާ ދަނޑިވަޅެއްގައި އެ ސަރަޙައްދަށް "ޞިއްޙަތު ޖަމުޢިއްޔާގެ" ޓީމުތައް ފޮނުވުމަކީ ރައްކާތެރި ކަމެއް ނޫން ކަމުގައި އެ ޖަމުޢިއްޔާއިން ދެކެއެވެ.

ޣައްޒާގެ އުތުރުގައި ހުންނަ ފަސް ހޮސްޕިޓަލްގެ ތެރެއިން އަލް-ޢަވްދާ ހޮސްޕިޓަލުން ބޭހާއި، ޞިއްޙީ ފަރުވާއަށް ބޭނުންވާ ހުރިހާ ސާމާނެއް ވަނީ ހުސްވެފައެވެ. އެ ހޮސްޕިޓަލަށް ބޭނުންވާ ސާމާނު ފޯރުކޮށްދޭން ޞިއްޙަތު ޖަމުޢިއްޔާއިން މަސައްކަތް ކުރި ނަމަވެސް، އެ ކަން ކާމިޔާބު ކުރެވިފައެއް ނުވެއެވެ. އަދި އެއީ އެ ސަރަޙައްދަށް ފޮނުވަން ހަމަޖެހިފައިވާ ބޭހުގެ ޝިޕްމަންޓް ފޮނުވުން ފަސް ކުރި ހަތަރު ވަނަ ފަހަރު ކަން ވެސް ފާހަގަ ކޮށްލަން ޖެހެއެވެ. އެ ކަމަށް ހުރަސް އަޅަމުން ދަނީ ޔަހޫދީންގެ ފައުޖުންނެވެ.

ޣައްޒާގެ މުސްލިމުންނާ ދެކޮޅަށް އޮކްޓޫބަރު 7 ވަނަ ދުވަހު ޔަހޫދީ ފައުޖުން ފެށި ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 23,084 އަށް އުފުލިފައެވެ. އޭގެ ތެރޭގައި 9,000 އަށްވުރެ ގިނަ ކުޑަކުދިން ހިމެނެއެވެ.