ސްރީލަންކާއަށް މިހާރު ކުރަމުންދާ ވިއްސާރައާ ގުޅިގެން އެ ގައުމުގެ ސްކޫލްތައް ވަގުތީ ގޮތުން ބަންދުކުރަން ތައުލީމީ ވުޒާރާއިން އަންގައިފިއެވެ.
މިގޮތަށް އެންގެވީ ދަރިވަރުންގެ ސަލާމަތާއި ރައްކާތެރިކަން ކަށަވަރު ކުރުމަށް ތައުލީމީ ވުޒާރާ އާއި، މަތީ ތައުލީމީ ވުޒާރާގެ ސެކްރެޓަރީ ނަލަކަ ކަލުވޭވާއެވެ.
އެ ވުޒާރާއިން ވަނީ ކުދިން ރައްކާތެރިކަމަކީ އެ ވުޒާރާއިން އެންމެ ބޮޑު އިސްކަމެއް ދެއްވާ ކަމެއް ކަަމަށްވެސް ބުނެފައެވެ. އަދި ސްކޫލްތައް ބަންދުކުރުމުގައި ކަމާގުޅޭ ހުރިހާ އިދާރާތަކުން ޒިންމާދާރު ކަމާއެކު މަސައްކަތް ކުރުމަށް އެ ވުޒާރާއިން ވަނީ އެދިފައެވެ.
ލަންކާއަށް މިހާރު ކުރަމުންދާ ވިއްސާރާއާ ގުޅިގެން އެ ގައުމުގެ އެކި ސަރަހައްދުތަކުގައި ފެންބޮޑުވެ ގެއްލުންވެސް ވަމުން ދެއެވެ. އަދި މިދިޔަ ހަފްތާއެއްހާ ދުވަސް ތެރޭގައި 30 އަށްވުރެ ގިނަ މީހުން މަރުވެސް ވެފައި ވެއެވެ.
ލަންކާއަށް މޫސުން ގޯސްފައިވާއިރު، ކުރިއަށް އޮތް 24 ގަޑިއިރުވެސް ބޯކޮށް ވާރޭ ވެހޭނެ ކަަމަށް އެ ގައުމުގެ މޫސުމާއި ބެހޭ ގައުމީ އިދާރާއިން ލަފާ ކުރެއެވެ.
